‘ज्वाइँ साब’ सिनेमा निर्माणको घोषणा भएको छ।
सिनेमालाई वसन्त निरौलाले निर्देशन गर्नेछन्। सोमबार खोटाङको धार्मिकस्थल हलेसी महादेव मन्दिरमा पूजाआजा गर्दै निरौलाले सिनेमा निर्माणको घोषणा गरेका हुन् ।
रेड आई सिनेमास्को प्रस्तुति रहेको सिनेमाको छायांकन केही महिनापछि सुरु हुनेछ ।
सिनेमाको छायांकन नेपाल, क्यानडा र अष्ट्रेलियमा गरिनेछ । सविन अधिकारीको कथा रहने सिनेमामा शंकर धितालको पटकथा तथा संवाद रहनेछ ।
निर्देशक निरौलाले सिनेमाका लागि कलाकारहरुको छनोट जारी रहेको बताएका छन् ।
‘सबै कलाकार फाइनल भएपछि हामी पत्रकार सम्मेलन गरेर जानकारी दिनेछौं । यो सिनेमालाई कमेडी र पारिवारिक कथामा निर्माण गरिनेछ’, उनले भने।
निरौलाले यसअघि ‘विजयपथ’, ‘आवेग’, ‘मेला’, ‘राजनीति’ आदि सिनेमाको निर्देशन गरेका थिए। उनले आफूले यसअघि निर्देशन गरेका सिनेमाभन्दा ‘ज्वाइँ साब’ उत्कृष्ट हुने दाबी गरेका छन् ।
