काठमाडौँ- भारत भ्रमणमा रहेका प्रधानमन्त्री पुष्पकमल दाहाल प्रचण्ड र भारतीय समकक्षी नरेन्द्र मोदीबीच भेटवार्ता सुरु भएको छ। दुई नेताबीच हैदराबाद हाउसमा द्विपक्षीय वार्ता जारी छ।
दुई नेताबीच छुट्टै छलफलपछि प्रतिनिधिमण्डल स्तरमा भेटवार्ता भएको हो। उक्त भेटवार्तापछि सहमतिपत्रमा हस्ताक्षर, केही परियोजनाको उद्घाटन र पत्रकार सम्मेलन गरी दुवै देशका प्रधानन्त्रीले सम्बोधन गर्ने कार्यसूची छ। प्रधानमन्त्री प्रचण्डले नेपाल र भारतबीच ‘महत्त्वपूर्ण सम्झौता’ हुने दाबी गरेका छन्।
भारतीय समकक्षी मोदीसँग भेट गर्नुअघि प्रधानमन्त्री प्रचण्ड आज बिहान साढे १० बजे महात्मा गान्धीकोे समाधिस्थल राजघाट पुगी पुष्पगुच्छा अर्पण गरेका थिए।
भ्रमण टोलीसहित बुधबार भारत पुगेका प्रधानमन्त्री प्रचण्ड चार दिन भारतमा रहनेछन्। चौथो दिन अपराह्न उनी दिल्लीबाट काठमाडौं फर्कने कार्यक्रम छ।
