नेपालको चलचित्र सेन्सर बोर्ड ‘बाहुबली’ फेम प्रभाष तथा कृति सेनन स्टारर ‘आदिपुरुष’मा समावेश ‘जानकी भारतीय छोरी हुन्’ भन्ने संवादमा हटाउने आदेश दिएको छ।
संवाद नहटाएसम्म फिल्मलाई सेन्सर पासको प्रमाणपत्र नदिने निर्णय पनि बोर्डले गरेको छ ।
‘चलचित्रमा जानकीलाई भारतीय बेटीको रुपमा प्रस्तुत भएको डायलगमा भारतीय शब्दलाई अनिवार्य रुपमा आवाजरहित (बीप) गर्न लगाई सो पश्चात मात्र चलचित्र जाँच प्रमाणपत्र दिने गरी सार्वजनिक प्रदर्शनको लागि अनुमति दिने निर्णय गरियो’, सेन्सरपछिको निर्णयपत्रमा भनिएको छ।
सञ्चार तथा सूचना प्रविधि मन्त्रालयका सहसचिव अनिलकुमार दत्तको नेतृत्वमा बिहीबार अपरान्ह फिल्मको सेन्सर कार्य भएको थियो।
सेन्सर बोर्डको निर्णयमा अन्य सदस्यले पनि हस्ताक्षर गरेका छन् ।
अब यो फिल्म प्रदर्शन गर्न उक्त संवाद हटाएर पुनः सेन्सर बोर्डमा पेश गर्नुपर्ने भएको छ।
बोर्ड श्रोत हाल नेपाल वितरकले सिनेमाको सो माग पूरा गरेर प्रदर्शन अनुमति लिइसकेको जनाएको छ।
