रिलिज लगत्तै आफ्नो संवादका कारण चर्को विवादमा फसेको ‘आदिपुरुष’ले आफ्ना विवादित संवादहरु सिनेमाबाट हटाएको छ।
यस्तै काठमाडौं महानगरपालिकाका मेयर बालेन शाहले आपत्ति जनाएको भनिएको संवादलाई पनि उसले हटाएको छ। ट्रेलरमा उक्त संवादलाई हटाइएको पाइएको छ।
पहिले रिलिज भएको ट्रेलरमा ‘आज मेरे लिए मत लड्ना, उस दिनके लिए लड्ना जब भारतकी किसी बेटी पर हात डाल्ने से पहिले दुराचारी तुम्हारा पौरूष याद करके थर्रा उठेगा’ भन्ने संवाद थियो भने हाल ट्रेलर हेर्दा उक्त संवादलाई ‘आज मेरे लिए मत लड्ना, उस दिनके लिए लड्ना जब इतिहासमे तुम्हारा नाम पढकर सम्मानसे शर झुक्जाएगें’ राखिएको छ। (हेर्नुस् ट्रेलरको २ मनेट ८ सेकेण्डबाट)
ट्रेलरमा समेत संपादन गरिएकाले सिनेमाबाट पनि मेकर्सहरुले सम्भवतः यसलाई यही अनुसार मिलाएको अनुमान गर्न सकिन्छ।
धेरैले बालेनले यो संवादमा आवश्यक्ताभन्दा बढि प्रतिक्रिया जनाएर हिन्दी सिनेमा प्रतिबन्ध गरेको भन्दै आलोचना गरेका छन्।
यो संवादमा आपत्ति प्रकट भएपछि आदिपुरुष निर्माण कम्पनीले सिनेमामा ‘सीता माताको जन्मभूमिबारे केही उल्लेख गरिएको छैन। बरू यसले आम रूपमा भारतका सबै महिलाको सम्मानलाई संकेत गरेको छ। हाम्रा लागि विश्वभरका महिलाको सम्मान निकै महत्व राख्छ। हामी तपाईंलाई यो फिल्मलाई कलात्मक माध्यमका रूपमा हेरिदिन र ठूलो दर्शकमाझ हाम्रो इतिहासप्रति रूचि जगाउने उद्देश्यलाई समर्थन गरिदिन आग्रह गर्दछौं’ भन्दै बालेनलाई सम्बोधन गरेर पत्र लेखेको थियो।
त्यस्तै उनीहरुले नेपाल र नेपालीको भावमा चोट पुर्याउने आशय कहिल्यै नभएको र त्यसो हुन पुगेको भए माफी चाहन्छौं समेत भनेका थिए।
यसैगरी ‘आदिपुरुष’बाट भारतमा विवादित बनेका अन्य संवादहरु पनि हटाएको भारतीय संचारमाध्यमहरुले उल्लेख गरेका छन्।
