सडक दुर्घटनामा परेकी धनगढीकी पत्रकार बिना शाहीले उपचारमा आर्थिक समस्या भएको भन्दै सहयोगको अपिल गरेकी छन् ।
धनगढीस्थित सुदूरपश्चिमान्चल एकेडेमी (एसपीए) कलेजमा अध्ययन गर्दै पत्रकारिता गर्दै आएकी शाही मंगलबार सडक दुर्घटनामा परेकी हुन् ।
धनगढीस्थित चटकपुरमा कार्यालय जाने समयमा उनको स्कुटर दुर्घटना परेको थियो । उनी धनगढीबाट अत्तरिया (टिभी टुडेको कार्यालय) जान लागेकी थिइन् ।
कार्यालय जाने क्रममा उनको स्कुटर ठोक्किएर दुर्घटना भएपछि खुट्टामा चोट लागेको छ । उनलाई दुर्घटनापछि धनगढीकै स्वस्तिक अस्पतालमा भर्ना गरिएको थियो । अस्पतालले उनको देब्रे खुट्टा भाचिएको भन्दै हिजै पहिलो चरणको शल्यक्रियासमेत गरेको छ । अस्पतालले उनलाई कम्तीमा एक हप्ता अस्पतालमै राखेर थप उपचार गर्नुपर्ने जनाएको छ । त्यसका लागि महँगो खर्च लाग्ने भएपछि पत्रकारिता गरेर पढ्दै आएकी उनलाई उपचारमा थप समस्या भएको छ ।
उपचारमा समस्या भएपछि उनले आफ्नो स्वास्थ्य उपचारार्थमा सहयोगलागि अपील समेत गरेकी छन् । सहयोगका लागि ९८४४५८११८० मा सम्पर्क गर्न आग्रह गरिएको छ ।
