आकाश श्रेष्ठ र सलोन बस्नेत स्टारर ‘हिँड्दा हिँड्दै’ले आफ्नो नयाँ रिलिज मिति तोकेको छ।
सिनेमा भदौ १ गते रिलिज हुने भएको छ।
यसअघि गत माघ २० गतेलाई प्रदर्शन मिति घोषणा गरिएको थियो । तर, विभिन्न कारणले रिलिज हुन सकेको थिएन ।
नयाँ प्रदर्शन मिति घोषणासँगै बिहीबार फिल्मको नयाँ पोस्टरसमेत सार्वजनिक गरिएको छ । पोस्टरमा मित्रता र प्रेमलाई देखाइएको छ ।
कोरोना महामारीको समयमा छायांकन भएको फिल्ममा आकाश र सलोनसँगै रेखा शाह, सानिया खान, विकास थापा मगर, विमल श्रेष्ठ, बाल कलाकार अर्विन थिङ्गलगायतको अभिनय छ।
मिलन आले मगरको निर्देशन रहेको फिल्मलाई सुशील पंगेनीले लेखेका हुन्।
आरआर फिल्म्सले वितरण गर्ने रोमान्टिक ड्रामामा सुमन कुमार तण्डुकारको छायांकन, देव महर्जनको द्वन्द्व निर्देशन, तारा प्रकाश लिम्बू र किरण माइकल घिमिरेको संगीत, गौतमराज खड्काको सम्पादन, कविराज गहतराज र सुरेन्द्र बसेलको कोरियोग्राफी छ ।
