गत साता आफ्नै घरमा झुण्डिएर आत्महत्या गरेका अभिनेता सारुक ताम्राकारको घटनामा छानविन गर्न नेपाली कलाकारहरुहरुको छाता संगठन नेपाल चलचित्र कलाकार संघले माग गरेको छ।
घटनाको १० दिनपछि संघले यस्तो माग गरेको हो। संघले माग गर्नुअघि सारुक निकट र अन्य कलाकारहरुले सुटिङ गरिरहेको कलाकार कसरी यस्तो निर्णयमा अचानक पुग्छ भन्दै घटनाप्रति संशय व्यक्त गर्दै छानविनको माग गर्दै आइरहेका थिए।
यसैबिच आज अपरान्ह बसेको कार्यसमिति बैठकपछि संघले ताम्राकारको मृत्युको विषयमा गहिरो छानबिन गरी सत्यतथ्य प्रकाशमा ल्याउन माग गरेको हो।
अध्यक्ष मोहन निरौलाद्वारा जारी विज्ञप्तिमा सामाजिक सञ्जालमा पछिल्लो समय आएका अभिव्यक्तिको छानबिन गरी कोही दोषी देखिए सत्यतथ्य उजागर गरी कानुनको दायरामा ल्याउन माग गरिएको छ । अध्यक्ष निरौलाले संघको बैठकमा समेत यो प्रकरणबारे छलफल भएको बताए ।
‘स्वर्गिय सारुक निधन हुनुभन्दा अघिल्लो दिनसम्म सिनेमा ‘ह्यासट्याग माया’मा अभिनय गरिरहेका थिए । स्वर्गिय सारुक सिंगो सिनेमा क्षेत्रमै काम प्रति लगनशील, सालिन र भद्र अभिनेताको रुपमा परिचित थिए’ , विज्ञप्तीमा भनिएको छ ‘उनको निधनलाई लिएर सिनेमा उद्योगका सबै पेशाकर्मीहरु शसंकित भइरहेको र यो घटनाको न्यायिक छानबिन हुनुपर्छ भन्ने आवाज उठिरहेकाले सो बिषयमा गहिरो छानबिन गरि सत्य तथ्यलाई प्रकाशमा ल्याइदिनका लागि संघ सम्बन्धित निकायसँग माग गर्दछ ।’
सारुकको मृत्युमा आफन्तले मालीगाउँ प्रहरी वृत्तमा घटनाको यथार्थ पत्ता लगाउन माग गर्दै निवेदन दिएका थिए। जसअनुसार प्रहरीले सारुकले प्रयोग गर्दै आएको मोबाइल समेत अनुसन्धानका लागि लिएको छ ।
मृत्युअघि सारुक राजीव गुरुङले निर्देशन गरिरहेको सिनेमा ‘ह्यासट्याग माया’को छायांकनमा व्यस्त थिए ।
यो सिनेमामा नम्रता श्रेष्ठ र रोयदीप श्रेष्ठ पनि शीर्ष कलाकारको रुपमा थिए ।
सिनेमाका लागि भनेर निर्माताले कलाकारका लागि बुढानीलकण्ठमा निर्मल पूर्जाको घर भाडामा लिएका थिए, जहाँ यी तीनैजना कलाकार बस्दै आएका थिए । उक्त घरलाई अहिले प्रहरीले सिल गरेको छ ।
आत्महत्याको अघिल्लो रात सुटिङका क्रममा अभिनेत्री नम्रता श्रेष्ठले सारुकसँग झगडा गरेकी थिइन्।
पुराना अभिनेता सानुकुमार ताम्राकारका एकमात्र सन्तान सारुकले रानी, मेरी मामु र इन्टुमिन्टु लण्डनमा सिनेमामा अभिनय गरेका छन् ।
