‘जय हो’ सिनेमाको पहिलो गीत सार्वजनिक गरिएको छ।
शोभित बस्नेतको प्रस्तुति रहेको सिनेमाको सोमबार राजधानीमा आयोजित एक कार्यक्रमका ‘जोमसोमको डाँडैमा हिँउ खेल्न जाने की’ बोलको गीत सार्वजनिक गरिएको हो ।
सार्वजनिक गीतमा शम्भुजित बास्कोटाको शब्द तथा संगीत रहेको छ।
गीतमा सुरेश लामा र अस्मिता अधिकारीको युगल स्वर सुन्न सकिन्छ । गीतलाई कविराज गहतराजले कोरियोग्राफी गरेका हुन्।
सार्वजनिक गीतको भिडियोमा सिनेमाका मुख्य कलाकार अर्पण थापा, सलोन बस्नेत, केकी अधिकारी, निशा अधिकारी र माओत्से गुरुङ फिचर्ड छन् ।
अडियो र भिडियोका हिसाबले गीत सामान्य छ, दर्शक श्रोतालाई प्रभावित गरिहाल्ने केही विशेष अनुभव गीत सुन्दा र हेर्दा लाग्दैन। कोरियोग्राफी र छायाँकन ठिकठाकमात्र छ।
टेक पौरखी राईको निर्देशन निर्माण भएको सिनेमामा प्रेम पाण्डे, दिपा शाक्य श्रेष्ठ, सुबि मगर, सुमिन गुरुङ, सुशान्त श्रेष्ठ लगायतका कलाकारको पनि अभिनय रहेको छ ।
सिनेमामा सम्राट बस्नेत द्धन्द्व निर्देशन, कविराज गहतराज र रामजी लमिछानेको कोरियोग्राफी, बनिश शाहको सम्पादन, गौतम राज खड्काको सह-सम्पादन, समीर मियाँको भिएफएक्स र केबलमान सिङ बस्नेत प्रोडक्सन डिजाइनर रहेको सिनेमाका मुख्य सहायक निर्देशक दिप्तप्रकाश अधिकारी हुन् ।
मुस्ताङ र कास्कीका विभिन्न रमणीय स्थानमा खिचिएको सिनेमामा सुरेश न्यौपानेको कथा लेखन, सौरभ लामाको छायांकन, शम्भुजित बाँस्कोटा र सागर आले मगरको संगीत छ । कमेडी, एक्सन र लभस्टोरीको समिश्रण रहेको सिनेमाका निर्माता राज के अधिकारी र सुरज सरकार हुन् ।
सिनेमा भाद्र ८ अर्थात् अगष्ट २५ मा रिलिज हुनेछ ।
