मुस्ताङ– नेकपा एमालेको प्रथम लुम्बिनी प्रदेश अधिवेशनअन्तगर्तत आज (सोमबार) बिहानबाट निर्वाचन प्रक्रिया पुनः सुरु हुने भएको छ । बिहान १० बजेदेखि उम्मेदवारी दर्तालगायत निर्वाचनका सबै प्रक्रिया सुरु हुने मुख्य निर्वाचन अधिकृत हरिप्रसाद भण्डारीले जानकारी दिए।
अध्यक्ष ओलीको निर्देशन समेत लत्याएर उनीहरु चुनावी मैदानमा उत्रिएका हुन्। उपाध्यक्ष पौडेल र महासचिव पोखरेलले प्रदेश अधिवेशनलाई प्रतिष्ठाको लडाइँ बनाएको बताइन्छ।
उम्मेदवारी मनोनयन चलिरहेका बेला निर्वाचन कमिटीले आइतबार साँझ साढे ८ बजेदेखि निर्वाचन प्रक्रिया स्थगित गरेको थियो । अध्यक्ष, उपाध्यक्षसहित पदाधिकारीमा दुई–दुई जनाको उम्मेदवारी परेपछि अध्यक्ष मण्डलले निर्वाचन प्रक्रिया स्थगित गर्न निर्देशन दिएको थियो ।
अध्यक्षमा राधाकृष्ण कँडेल र हरि रिजालले उम्मेदवारी मनोनयन गरेका छन् । कँडेल वर्तमान अध्यक्ष हुने भने रिजाल केन्द्रीय सदस्य हुन् ।
त्यस्तै उपाध्यक्षमा भोजप्रसाद श्रेष्ठ, विश्वास बराल (अनुप)ले उम्मेदवारी दिएका छन्। अधिवेशनले ५ जना पदाधिकारीसहित २०५ सदस्यीय प्रदेश समिति चयन गर्नेछ। दुई प्यानल बनाएर चुनावी प्रतिस्पर्धा हुने देखिएको छ ।
२०५ सदस्यीय प्रदेश कमिटीमा १२ जिल्लाबाट जिल्लागत प्रतिनिधि १८६, अपाङ्गबाट एक, मजदुरबाट ३, खुलाबाट पदाधिकारीसहित १५ जना निर्वाचित हुने छन् । पदाधिकारी ५ जना हुनेछन् ।
अधिवेशनमा १२ वटै जिल्लाका ८२ हजार ८९५ पार्टी सदस्यहरूबाट एक सय जना बराबर एक जना र २३ वटा जनसंगठनबाट ८३ जना गरी १००४ जना प्रतिनिधि छनोट भएका छन् ।
अधिवेशनमा रुपन्देहीबाट सबैभन्दा धेरै १ सय ६४, कपिलवस्तुबाट ७२, दाङबाट १३१, बाँकेबाट ५४, बर्दियाबाट ७४, रुकुमपूर्वबाट १२, रोल्पाबाट २७, प्युठानबाट ५७, अर्घाखाँचीबाट ८२, गुल्मीबाट १११, पाल्पाबाट ८३ र पश्चिम नवलपरासीबाट ५२ जना प्रतिनिधि छनोट भएका छन् । अधिवेशनले यसअघि ५ सय ७६ सदस्यीय रहेको प्रदेश कमिटीलाई २०५ सदस्यीय बनाउनेछ ।
