काठमाडौँ। एसिसी एसिया कपअन्तर्गत भारत र पाकिस्तानबीच जारी सुपर फोरको खेल वर्षाका कारण रोकिएको छ ।
श्रीलंकाको आर प्रेमादाशा क्रिकेट रंगशालामा टस हारेर ब्याटिङ गरिरहेको भारतले २४.१ ओभरमा दुई विकेट गुमाउँदै १ सय ४७ रन बनाएको अवस्थामा खेल रोकिएको हो ।
भारतका लागि केएल राहुल १७ र विराट कोहली आठ रन बनाएर क्रिजमा छन्। यसअघि शुभमन गिल ५२ बलमा १० चौकाको मद्दतमा ५८ तथा कप्तान रोहित शर्मा ४९ बलमा ६ चौका र चार छक्काको मद्दतमा ५६ रन बनाएर आउट भए ।
पहिलो विकेटका लािग शुभमन र रोहितले १ सय २१ रनको साझेदारी गरे ।
पाकिस्तानका लागि शाहिन शाह अफ्रिदी र शादब खानले समान एक विकेट लिएका छन् ।
समूह चरणमा यी दुईबीचको खेल वर्षाका कारण रद्द भएको थियो । पाकिस्तान सुपर फोरमा लगातार दोस्रो जित निकाल्ने लक्ष्यमा छ । पाकिस्तानले पहिलो खेलमा बंगलादेशलाई सात विकेटले पराजित गरेको थियो ।
भारत पनि पाकिस्तानलाई पराजित गर्दै सुपर फोरको सुरुआत सुखद बनाउने लक्ष्यमा छ ।
