काठमाडौं । साताको पहिलो कारोबार दिन आइतबार शेयर बजार उच्च अंकले घटेको छ । आइतबार ४२.१४ अंकले घट्दै बजार १९६४.९१ को बिन्दुमा झरेको छ । आइतबार समग्रमा बजार २.०९ प्रतिशतले घट्यो ।
उच्च अंकले घटेको बजारमा फाइनान्स, होटल तथा पर्यटन र व्यापार क्षेत्रमा तीन प्रतिशतभन्दा बढीले गिरावट आयो भने विकास बैंक, हाइड्रो, लाइफ इन्स्योरेन्स र ननलाइफ इन्स्यारेन्स क्षेत्रमा दुई प्रतिशतभन्दा बढीले गिरावट आयो ।
कारोबार भएका २२७ कम्पनीमध्ये २१३ कम्पनीको मूल्य घट्यो । उच्च अंकले घटेको बजारमा पनि ११ कम्पनीको मूल्य भने केही अंकले बढेको छ । जहाँ चार कम्पनीको मूल्य स्थिर रहेको छ ।
बिक्रिकर्ता झुम्मिँदा कारोबार रकम बढ्यो
आइतबार उच्च अंकले घटेको भएपनि कारोबार रकम भने एक महिनायताकै उच्च रह्यो । आइतबार ५६ लाख ५९ हजार ४५८ कित्ता शेयर किनबेच हुँदा कारोबार रकम दुई अर्ब दुई करोड ८४ लाख रुपैयाँको भयो ।
जुन स्तरको कारोबार साउन ३० मात्रै भएको थियो । त्यसयता बजारसँगै कारोबार रकम पनि निरन्तर एक अर्बको हाराहारीमा थियो ।
आइतबार बिक्रीकर्ता झुम्मिँदा कारोबार रकम बढ्न गएको हो । आइतबार मात्रै दोस्रो बजारमा कारोबार सुरु भएको रिलायबल नेपाल लाइफ इन्स्योरेन्स कम्पनी शेयर किनबेचका आधारमा सबैभन्दा अग्रस्थानमा छ ।
रिलायबलको चार लाख ८७ हजार १८६ कित्ता किनबेच हुँदा २४ करोड ५२ लाख ९३ हजार रुपैयाँको भयो ।
आइतबार मात्रै बैंकहरुले असोज महिनाका लागि ब्याजदर सार्वजनिक गरेका थिए । जसमा धेरैजसो बैंकको ब्याजदर बढेको छ ।
बैंकको ब्याजदर बढेको प्रभाव शेयर बजारमा परेको कतिपयको अनुमान छ ।
