काठमाडौं । क्यानडाको हाउस अफ कमन्सका सभामुखले राजीनामा दिएका छन् । चौतर्फी विरोध झेल्न नसकेपछि सभामुख एन्थोनी रोटाले मंगलबार राजीनामा बुझाएका हुन् ।
युक्रेनी राष्ट्रपति भोलोदिमिर जेलेन्स्कीको क्यानडा भ्रमणको बेला सभामुख रोटाले जेलेन्स्कीसँगै दोस्रो विश्वयुद्धमा रुसविरुद्ध लडाईं लडेका ९८ वर्षीय यारोस्लाभ हुन्कालाई ‘नायक’ भन्दै सम्मान गरेका थिए । सभामुखको प्रस्तावमा हाउस अफ कमन्सका सबै सांसदहरुले उठेर हुन्कालाई अभिवादन टक्य्राएका थिए ।
तर, सभामुखबाट सम्मानित हुन्का हिटलरको पार्टी नाजीका तर्फबाट लडेका युक्रेनी नागरिक भएको तथ्य खुलासा भएपछि सभामुख र प्रधानमन्त्री जस्टिन ट्रुडोको चौतर्फी विरोध भएको थियो । विपक्षी नेता पियरे पोइलिभ्रेले प्रधानमन्त्री ट्रुडोले सार्वजनिकरुपमा माफी नमागेसम्म विरोधका कार्यक्रम चर्काउने चेतावनी दिएका थिए । विपक्षी दलले सभामुखले राजीनामा दिनुपर्ने बताएको थियो ।
सभामुख रोटाले माफी मागेपनि विरोध नथामिएपछि प्रधानमन्त्री ट्रुडाेले नै राजीनामा दिन सुझाएका थिए । विरोध आफैंमाथि केन्द्रीत हुने देखेपछि ट्रुडोले सभामुखलाई राजीनामा दिन आग्रह गरेका थिए ।
चौतर्फी दबाब र ट्रुडोलाई जोगाउन मंगलबार सभामुखले राजीनामा दिएका हुन् । तर, सभामुखको राजीनामापछि पनि विरोध रोकिएको छैन । ट्रुडोले निमन्त्रणामा जेलेन्स्की आएको भन्दै विपक्षीले विरोध ट्रुडो केन्द्रीत गराएका छन् । एजेन्सीबाट
सम्बन्धित समाचार
https://sutranews.com/192502/2023/25/
