काठमाडौँ । स्वास्थ्य क्षेत्रमा क्रियाशील ट्रेड युनियन तथा पेसागत संघ–संगठनहरुको संजालले सरकारसँग चार बुँदे माग अघि सारेको छ ।
केही समययता मकवानपुर, कञ्चनपुर, लमजुङ, कास्की, चितवन, बुटवल, मोरङ, पाटन लगायतका अस्पतालहरूमा चिकित्सक तथा स्वास्थ्यकर्मीमाथि सांघातिक आक्रमण भएको भन्दै संजालले पेसागत सुरक्षाका लागि चार बुँदे माग अघि सारेको हो ।
स्वास्थ्य जस्तो संवेदनशील क्षेत्रको सुरक्षाका लागि नेपाल सरकारबाट हालसम्म गरिएका प्रतिबद्धतालाई व्यावहारत कार्यान्वयन नगर्ने हो भने चिकित्सक तथा स्वास्थ्यकर्मीहरूको दायित्व र कर्तव्यनिष्ठाले मात्र नेपालको स्वास्थ्य सेवालाई न्याय गर्न नसक्ने भन्दै संजालले आफ्ना माग पूरा गर्न सरकारको ध्यानाकर्षण गराएको छ ।
स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन २०६६ (संशोधन सहित)को अक्षरस पालना गरी हालै पोखरा र हेटौंडा लगायत अन्य ठाउँका चिकित्सक तथा स्वास्थ्यकर्मीमाथि गरिएको सांघातिक आक्रमणकारीहरूलाई कानुनी दायरामा ल्याई कडा कारबाही हुनु पर्ने र भावी दिनमा देशका कुनै पनि स्वास्थ्य संस्थामा यस्ता घटनामा संलग्न दोषीलाई तत्कालै पक्राउ गरी सोही ऐन बमोजिमको सजाय हुनु पर्ने संजालको माग छ ।
यस्तै, हाल आन्दोलनरत चिकित्सक तथा स्वास्थ्यकर्मीका सबै मागलाई तत्काल पूरा गर्नुपर्ने, स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐनलाई अझ सशक्त र प्रभावकारी बनाउनका लागि कानुन परिमार्जन तथा कार्यान्वयनको सुनिश्चितता हुनुपर्ने माग पनि संजालले अघि सारेको छ ।
संजालका संयोजक डा. अनिल विक्रम कार्की र सदस्यसचिव माइकल देवकोटाले जारी गरेको विज्ञप्तिमा स्वास्थ्यमा क्रियाशील ट्रेड युनियन तथा पेसागत संघ संगठनहरूको संजालसँग विगतमा भएका सबै सम्झौताहरूको अक्षरस पालना हुनुपर्ने माग पनि अघि सारिएको छ ।
