‘मुखमा रामराम बगलीमा छुरा’ उखान प्रधानमन्त्री पुष्पकमल दाहाल ‘प्रचण्ड’कै लागि बनेको हो कि जस्तो भान अहिले राजनीतिक वृतमा भइरहेको छ । प्रचण्ड मुखले एकथोक भन्छन् र गर्न चाहिँ कुरा गर्छन्, यो त उनको संस्कार र निजी बानी नै हो । पछिल्ला राजनीतिक घटनाले पनि प्रचण्डलाई माथि कै उखानको उपमा दिन सकिन्छ ।
हरेक सभा समारोह वा कुनै औपचारिक कार्यक्रममा प्रचण्ड भ्रष्टाचार र बेथितिको अन्त्य गर्न आफूँ लागिरहेको, भ्रष्टाचारविरोधी अभियान चलाएकोलगायतका यावत् भाषण जप्छन् । तर, उनको कार्यशैली भने यो भनाईको ठीक विपरीत छ । भ्रष्टाचार विरोधी अभियान त होइन, सरकार आफंै भ्रष्टाचारी जोगाउन थालेको भान स्पष्ट देख्न सकिन्छ । मंगलबार मात्रै पनि पूर्वसभामुख कृष्णबहादुर महरालाई नौ किलो सुन प्रकरणमा सीआईबीले बयान लियो । तर अनौठो चाहिँ के भयो भने महरालाई बयान लिए पनि सीआईबीले प्रतिवादी बनाएको छैन ।
उनलाई सुन प्रकरणको साक्षीको रूपमा बयान लिएको सीआईबी स्रोतको दाबी छ । यो राजनीतिक नेतृत्वको दबाब र स्वयम् प्रधानमन्त्री प्रचण्डको एकोहोरोपनले महरा प्रतिवादी हुनबाट जोगिएका हुन् । प्रचण्डका विश्वासपात्र मानिने महरा विगतमा पनि यस्ता प्रकरणमा जोगिरहेका छन् ।
महरालाई बयान लिए पनि अब उनीमाथि कुनै कारबाही अघि बढाइने छैन । किनकि, सीआईबीले तत्काल नै प्रतिवेदन बुझाउँदैछ । यो बयान काम चलाउ र जग हसाउनका लागि मात्र सीआईबीले लिएको प्रष्ट हुन्छ । सीआईबीले बयान लिने तर प्रतिवादी नबनाउने गरेको यो नै पहिलो कार्य होइन ।
बालुवाटार जग्गा प्रकरणमा पूर्वप्रधानमन्त्रीहरू बाबुराम भट्टराई र माधवकुमार नेपाललाई पनि यसै गरेको थियो । अझ भट्टराई र नेपालको घरमै पुगेर उनीहरूकै सहजतामा मात्र सीआईबीले बयान लिएको थियो । यसबाट के प्रष्ट हुन्छ भने प्रधानमन्त्री प्रचण्ड सीआईबीलाई आफ्ना मान्छे छुटाउन दबाब दिइरहेका छन् ।
यस्तै, सीआईबीले पूर्व मुख्यसचिव लीलामणी पौड्याललाई पनि प्रतिवादी कायम नगर्न सिफारिस गरेको थियो । साउन २८ मा सिआईबीले कार्यालयमा नै बोलाएर पौड्यालसँग बयान लिएको थियो । योजनाबद्धरूपमा कागजात किर्ते बनाएर तथा नक्कली मोही खडा गरेर ललिता निवासको १४७ रोपनी सरकारी जग्गा हिनामिना भएको हुँदा पनि प्रहरीले उनीहरूलाई जोगाएको छ ।
माधव नेपाल र डा. भट्टराई नेतृत्वको मन्त्रिपरिषदको निर्णयको आधारमा पनि बालुवाटारको जग्गा हिनामिना भएको भेटिएको थियो । नेपाल र भट्टराईले नेतृत्व गरेको चार वटा मन्त्रिपरिषदको निर्णयको आधारमा ललिता निवास क्याम्पभित्र बाटो बिस्तारको नाममा जग्गा सट्टापट्टा र नक्कली पशुपति टिकिन्छा गुठी खडा गरेर ‘मोहीयानी हक’को नाममा जग्गा घोटाला गरिएको अनुसन्धान निष्कर्ष छ ।
यति मात्र होइन, प्रचण्डले सत्ता टिकाउन नक्कली भुटानी शरणार्थी प्रकरणमा समेत मुख्य अभियुक्तहरू जोगाए । कांग्रेस नेता बालकृष्ण खाणहरू पक्राउ परे पनि कांग्रेस सभापति शेरबहादुर देउवा पत्नी आरजु राणाहरू अनुसन्धान सम्ममा पनि तानिएनन् ।
