काठमाडौं । शेयर बजार निरन्तर ओरालो यात्रामा छ । दसैँ बिदापछि खुलेको बजारमा ५६.१२ अंकले गिरावट आएको छ ।
दसैँ बिदापछि शेयर बजार कात्तिक १२ देखि खुलेको थियो । कारोबार खुलेको पहिलो दिनमै २८.१८ अंकले गिरावट आएको थियो । कात्तिक १३ मा ३.०४ अंकले बृद्धि भएपनि त्यसयता बजार निरन्तर घटिरहेको छ ।
साताको पहिलो कारोबार दिन आइतबार घटेर बन्द भएको बजार साताको अन्तिम कारोबार दिन पनि घटेर बन्द भएको छ । आइतबार १९०३.८४ अंकमा ओपन भएको बजार बिहीबार आउँदा १८४७.७० को अंकमा बन्द भएको छ ।
दैनिक कारोबार एक अर्ब पनि हुन सकेन
दसैँपछिको कुनै पनि दिन शेयर बजारमा दैनिक कारोबार एक अर्ब पनि हुन सकेन । आइतबार ७३ करोड ६८ लाख रुपैयाँ बराबरको शेयर कारोबार भएको थियो । त्यसयता योबीचमा मंगलबार सबैभन्दा न्यून ५४ करोड ६८ लाख रुपैयाँको कारोबार भयो ।
नेपाल स्टक एक्सचेन्जका अनुसार साताको अन्तिम कारोबार दिन बिहीबार ९६ करोड ४४ लाखको शेयर कारोबार भयो । जुन साताभरकै सबैभन्दा धेरै रहेको नेप्सेले जनाएको छ ।
तथापी, एक अर्बसमेत कारोबार हुन नसक्नुले लगानीकर्तामा चरम निराशा भएको देखिन्छ ।
