काठमाडौं । भारतीय क्रिकेट टोलीका ओपनर शुभमन गिल नयाँ सिजनको इण्डियन प्रिमियर लिग (आईपीएल)का लागि गुजरात टाइटन्सको कप्तान नियुक्त भएका छन् ।
गुजरातले आफ्नो सामाजिक सञ्जालमार्फत गिल कप्तानमा नियुक्त भएको जानकारी दिएको हो । ‘आगामी सिजनमा टाइटन्सको नेतृत्व गर्न तयार छ, धैर्य र उत्साहका साथ तपाईलाई यो नयाँ कामनाको लागि मात्र,’ गुजरातले भनेको छ ।
भारतीय स्टार अलराउण्डर हार्दिक पाण्ड्या मुम्बई इन्डियन्स फर्किएपछि गिल गुजरातको कप्तानमा नियुक्त भएका हुन् । पछिल्लो दुई सिजन गुजरात टाइटन्सको कप्तानी गरेका हार्दिक ट्रेडमार्फत मुम्बईमा अनुबन्ध भएका हुन् ।
सन् २०१५ मा मुम्बईबाटै आईपीएलमा डेब्यु गरेका हार्दिकले २०२१ सम्म मुम्बईबाट खेल्दै आएका थिए । पछिल्लो समय उनी फ्रेन्चाइज गुजरातको कप्तान बनेका थिए ।
पाण्ड्याको कप्तानीमा पहिलो सिजनमै गुजरात च्याम्पियन बनेको थियो । गत सिजन गुजरात उपविजेता बनेको थियो ।
