काठमाडौं । अमेरिकाले सिख पृथकतावादी नेता र अमेरिकी नागरिकको अमेरिकी भूमिमा हत्या गर्ने षड्यन्त्रको पर्दाफास गरेको दाबी गरेको छ ।
निखिल गुप्ता नामका एक भारतीय नागरिकलाई एक लाख डलर (लगभग ८३ लाख रुपैयाँ) नगदको बदलामा पृथकतावादी नेताको हत्या गर्न भाडामा लिएका हत्यारालाई ठेक्का दिएको आरोप लागेको छ ।
अभियोगअनुसार हत्याको जिम्मा दिइएको हिटम्यान वास्तवमा अमेरिकी गुप्तचर एजेन्सीका गुप्तचर एजेन्ट थिए ।
निखिल गुप्ता अहिले चेक रिपब्लिकको जेलमा छन् । उनीमाथि लागेको आरोपमा उनलाई २० वर्षसम्मको जेल सजाय हुन सक्छ ।
निखिल गुप्तालाई भारतीय अधिकारीले निर्देशन दिएको आरोप छ । अभियोगमा भारतीय अधिकारीको नाम छैन ।
अभियोगमा पीडितको नाम छैन, तर भारतीय मिडिया रिपोर्टका अनुसार निशाना वकिल र सिख पृथकतावादी नेता गुरपतवन्त सिंह पन्नु थिए । गुरपतवन्त सिंह पन्नु भारतमा ‘आतंकवादी’ घोषित भएका छन् ।
ह्वाइट हाउसले अमेरिकाले यो हत्याको षडयन्त्रको विषय भारतसँग उच्च तहमा उठाएको बताएको छ ।
यसअघि क्यानाडाले सिख पृथकतावादी नेता हरदीप सिंह निज्जरको हत्यामा भारतको संलग्नता रहेको आरोप लगाएको थियो । क्यानाडाका यी आरोपपछि भारत र क्यानाडाबीचको सम्बन्ध चिसिएको छ । एजेन्सी
