काठमाडौं । नेपाल टी–२० च्याम्पियन लिग विजेता टोली लुम्बिनी अल स्टार्सको समकक्षी टोली डालास अल स्टार्सले अमेरिकाको फ्लोरिडामा हुन लागेको यूएस ओपन क्रिकेट प्रतियोगिता खेल्ने भएको छ ।
उक्त प्रतियोगिताका लागि नेपालबाट ६ जना खेलाडी जाने भएको छ । अमेरिकाको फ्लोरिडामा हुने प्रतियोगिता डिसेम्बर ८ देखि १६ तारिखसम्म हुने छ ।
डालास अल स्टार्समा खेल्नका लागि नेपालबाट आरिफ शेख, आशिफ शेख, ललित राजवंशी, कुशल मल्ल, दिपेन्द्र सिंह ऐरी र अनिल शा जाने भएका छन् । दिपेन्द्र र अनिलले लुम्बिनी अल स्टार्सबाट नेपालमा टी–२० खेलेका थिए ।
आठ टिमको सहभागिता हुने प्रतियोगिताको पुरस्कार राशी दुई लाख ५० हजार डलर रहेको छ । प्रतियोगिता खेल्नका लागि नेपालबाट खेलाडीहरू जानेबारे टुंगो लाग्न बाँकी रहेको छ ।
यसका लागि नेपाल क्रिकेट संघ (क्यान)ले पनि समन्वय गरिरहेको बताइएको छ । प्रतियोगिताका लागि सबै टिमले स्टार विदेशी खेलाडीलाई अनुबन्ध गरेका छन् ।
