काठमाडौं । उत्तर कोरियाले दिएको मिसाइलले युक्रेनमा पहिलो पटक आक्रमण भएको छ । युक्रेनी राष्ट्रपति जेलेन्स्कीका सहायक मिखाइल पोडोल्याकले शुक्रबार वाशिंगटनको मूल्यांकनको आधारमा यो जानकारी दिएका हुन् ।
ह्वाइट हाउसले पनि रुसले युक्रेनमा उत्तर कोरियाली ब्यालेस्टिक मिसाइलले आक्रमण गरेको बताएको छ । मस्कोले यो आरोपमा अहिलेसम्म कुनै प्रतिक्रिया दिएको छैन ।
रुसी वायु रक्षा प्रणालीले क्रिमिया र दक्षिणी रुसमा दर्जनौँ युक्रेनी ड्रोन नष्ट गरेको छ । युक्रेनले रुसको कब्जामा रहेको प्रायद्वीपलाई निशाना बनाउने रणनीति अपनाएको छ । रुसले गएराति प्रक्षेपण गरेका २९ शाहेद ड्रोनमध्ये २१ वटा खसालेको पनि किभले जनाएको छ ।
क्रिमियाको सबैभन्दा ठूलो सहर सेभास्टोपोलमा हवाई हमला भएको थियो । प्रायद्वीप जोड्ने पुलमा केहीबेर यातायात ठप्प भएको थियो । दक्षिणी क्रास्नोडार रूसी हवाई हमलाहरूको लागि एक महत्त्वपूर्ण आपूर्ति लिंक हो ।
रुसी रक्षा मन्त्रालयले क्रिमियामा ३६ ड्रोनलाई रोकिएको बताएको छ । काला सागरको उत्तरपश्चिमी भागमा एक युक्रेनी एन्टी-शिप मिसाइल पनि नष्ट भएको थियो ।
जनवरी ६ मा रुससँग सीमा जोडिएको बेलगोरोडमा युक्रेनी हवाई आक्रमणमा २५ जनाको मृत्यु भएको थियो ।
