काठमाडौं । मध्य जापानमा गएको विनाशकारी भूकम्पको पाँच दिनदेखि भग्नावशेषमा फसेकी ९० वर्षभन्दा बढी उमेरकी महिलालाई उद्धार गरिएको छ ।
सरकारले उद्धार प्रयास जारी राखिएको जनाएको छ । तर, हिम वर्षा र आँधीका कारण आइतबार राहत वितरण तथा उद्धार कार्य जटिल हुन सक्ने बताएको छ ।
जापानमा जनवरी १ मा गएको ७.५ म्याग्निच्यूडको भूकम्प र त्यसपछिका पराकम्पनमा परी कम्तीमा १२६ जनाको मृत्यु भएको छ । घटनामा २२२ जना हराइरहेको स्थानीय अधिकारीले जानकारी दिएका छन् ।
विनाशकारी भूकम्प गएको तीन दिनपछि जीवित व्यक्तिहरू भेट्टाउने आशा प्रायः धुमिल हुन्छ । तर, सुजु शहरमा भत्किएको घरको भग्नावशेषमुनि पाँच दिन बिताएकी ती वृद्धालाई शनिबार उद्धार गरिएको छ ।
उनलाई उपचारका लागि अस्पताल लगिएको छ । अस्पतालमा लानुअघि उनले प्रश्नको स्पष्ट जवाफ दिइरहेको सरकारी प्रसारक एनएचकेले जनाएको छ ।
प्रतिक्रिया दिनुहोस्
