काठमाडौं । भारतको बेङ्गलोरको एक स्टार्टअप कम्पनीकी सीईओ सूचना सेठले आफ्नो चार वर्षीय छोराको हत्या गर्ने योजना बनाएको खुलेको छ ।
छोरालाई मार्ने योजनामा ३९ वर्षीया सूचना छोरासँग गोवा पुगेकी थिइन् । होटलको कोठामा हत्या गरेको दुई दिनपछि बुधबार गोवा प्रहरीले आशंका व्यक्त गरी उनलाई पक्राउ गरिएको छ ।
गोवा पुलिसका अनुसार ती महिला बसेको होटलको कोठाबाट खोकी लाग्दा खाने ‘सिरप’का दुई खाली बोतल बरामद गरिएको छ । हत्या गर्नुअघि सूचनाले छोरालाई कफ सिरपको भारी डोज खुवाएको हुन सक्ने प्रहरीको आशंका छ । सूचनाले होटलका कर्मचारीबाट खोकीको सिरपको बोतल अर्डर गरेकी थिइन् ।
मृतक बालकको पोस्टमार्टम रिपोर्ट आइसकेको छ । कर्नाटकको हिरियुर सरकारी अस्पतालका डा. कुमार नाइकले बालकको सिरानी वा तौलियाले घाँटी थिचेर हत्या गरिएको बताए ।
बालकको अनुहार र छाती सुन्निएको थियो । नाकबाट रगत बगेको थियो । पोष्टमार्टम हुनुभन्दा करिब ३६ घण्टाअघि बालकको मृत्यु भएको थियो ।
के हो खास कुरा
बेङ्गलोरको स्टार्टअप कम्पनी माइण्डफुल एआई ल्याबकी संस्थापक र सीईओ सूचना ६ जनवरीमा आफ्नो छोरासँग गोवाको सोल बन्यान ग्राण्डे होटलमा पुगेकी थिइन् । उनले गत सोमबार होटलबाट चेकआउट गरेका थिए । उनी ट्याक्सीमा बेङ्गलोर गएकी थिइन् ।
यहाँ होटलका कर्मचारी सूचना बसेको कोठा सफा गर्न गएपछि रगतले लतपतिएको तौलिया देखे । यो जानकारी पछि गोवा पुलिसलाई दिइएको थियो ।
गत सोमबार राति कर्नाटक प्रहरीले उनलाई बेंगलुरु पुग्नुअघि चित्रदुर्गबाट पक्राउ गरेको थियो । मंगलबार गोवा प्रहरीले सूचनालाई पक्राउ गरेको हो । गोवाको मापुसा अदालतले उनलाई ६ दिनको लागि प्रहरी हिरासतमा पठाएको छ ।
सम्बन्ध विच्छेदपछि छोरालाई पूर्वश्रीमानले भेटेको रिस
प्रहरीका अनुसार सूचना मूलतः पश्चिम बंगालकी बासिन्दा हुन् । उनी बेङ्गलुरुमा बस्थे । जबकि वेङ्कट रमन केरलाका बासिन्दा हुन् ।
दुवैले सन् २०१० मा विवाह गरेका थिए । वेङ्कट एआईसँग सम्बन्धित काम गर्ने व्यक्ति हुन् । सन् २०१९ मा सूचनाले छोरालाई जन्म दिइन् ।
तर, २०२० देखि सूचना र उनका श्रीमानबीच विवाद सुरु भयो । त्यसपछि दुवैले सन् २०२२ मा सम्बन्ध विच्छेदका लागि निवेदन दिए । अदालतले सूचनाका श्रीमानलाई हरेक आइतबार आफ्नो बच्चालाई भेट्न आदेश दिएको थियो ।
तर, सूचना आफ्ना श्रीमानलाई छोरासँग भेट्न दिन चाहँदैन थिइन् । सोही कारण उनले छोराको हत्या गरेको हुन सक्ने प्रहरीको आशंका छ ।
हत्या हुनुअघि छोरासँग कुरा
घटनाको समयमा सूचनाका पूर्वश्रीमान् वेङ्कट इण्डोनेसियामा थिए । मिडिया रिपोर्टहरूमा दाबी गरिएको छ कि जनवरी ७ मा उनले आफ्नो छोरासँग भिडिओ कलमा कुरा गरेका थिए । त्यसपछि सूचनाले छोराको हत्या गरिन् ।
गोवा पुलिसको कलमा वेङ्कट जनवरी ९ मा कर्नाटकको चित्रदुर्ग आएका थिए । उनको सहमतिपछि छोराको शवको पोष्टमार्टम भयो । वेङ्कट आज बुधवार छोराको शव लिएर चित्रदुर्गबाट बेङ्गलोर पुगेका छन् । बेङ्गलोरको हरिश्चन्द्र घाटमा अन्तिम संस्कार गरिएको थियो ।
यसरी पक्राउ परिन् सूचना
गोवा पुलिसका अनुसार उनीहरूले जनवरी ८ मा होटलबाट घटनाको जानकारी पाएका थिए । प्रहरीले सीसीटीभी चेक गर्यो । जसमा छोरासहित होटलमा आउँदै गरेको जानकारी देखिएको छ । तर, चेकआउटको समयमा उनी एक्लै थिइन् । त्यसपछि गोवा पुलिस कारबाहीमा आयो ।
होटलका कर्मचारीले सोमबार सूचना आफ्नो कोठाबाट एक्लै निस्केर बेङ्गलोरको लागि ट्याक्सी बुक गर्न भनिन् । कर्मचारीले महिलालाई क्याब भाडा बढी हुने बताए ।
उनले सूचनालाई फ्लाइटबाट बेङ्गलोर जान सल्लाह दिए । तर, उनी ट्याक्सीमा मात्रै जाने जिद्दीमा थिइन् । कर्मचारीले ट्याक्सी बोलाए । जसमार्फत सूचना आफ्नो सामान लिएर बेङ्गलोर गइन् ।
