फिल्म ‘ए मेरो हजुर २’मा काम गरेपछि नायक सलिनमान बनियाँको चर्चा खुबै भयो । यो फिल्म हिट भएपछि सलिनमानलाई नेपाली फिल्मको नयाँ स्टारको रूपमा समेत विश्लेषण गरिएको थियो ।
सलिनले यसपछि फिल्म ‘यात्रा’मा काम गरे । यो फिल्मले अपेक्षाकृत व्यापार नगरेपछि उनी केही हदसम्म निराश बने । जसका कारण सलिनले धेरै समयसम्म कुनै पनि नयाँ फिल्म साइन गरेनन् । ‘यात्रा’मा काम गरेपछि सलिनमानलाई अन्य केही चर्चित ब्यानरबाट अफर पनि गरिएको थियो । तर, उनले फिल्ममा काम गर्ने मन बनाएनन् । बरु, उनी आफ्नो दैनिकी अनलाइन भिडियो गेम पब्जी खेलेर समय बिताइरहेका हुन्थे ।
सलिनले पब्जी खेल्दै गर्दा आफ्ना फ्यानहरूसँग कुराकानी पनि गर्ने गरेका थिए । त्यस समयमा अधिकांश फ्यानहरूको चासो उनको नयाँ फिल्म कहिले आउँछ भन्नेमा नै थियो ।
पब्जी लाइभमा बसेर आफूलाई राम्रो कथाबाट अफर नै नआएको गुनासो गर्ने गरेका उनले फ्यानको प्रश्नको जवाफ दिने क्रममा नेपाली फिल्मको कथावस्तु पुरानै शैलीमा अगाडि बढेको भन्दै काम गर्न रहर नलागेको र सार्वजनिक भएका आफ्ना २ फिल्म हेरेर नै चित्त बुझाउन समेत आग्रह गर्ने गरेका हुन्थे ।
फिल्म क्षेत्रबाट टाढा जस्तै देखिएर नयाँ फिल्ममा काम गर्न भन्दा पनि पब्जी खेल्नमै बढी केन्द्रित देखिरहेका सलिनले सलोन–सलिना फिल्मसको ब्यानरमा निर्माण हुन लागेको फिल्म ‘युनिभर्सिटी अफ गुन्डाज्’बाट कमब्याक गर्ने चर्चा सुरु भएको छ ।
मंगलबार पोस्टर सार्वजनिक गर्दै औपचारिक घोषणा गरिएको यो फिल्मको शीर्ष भूमिकामा सलिन र सलोन बस्नेत छन् । पोस्टर हेर्दा यी दुई हिरोलाई एंग्री मुडमा देख्न सकिन्छ ।
फिल्मको पोस्टर र हिरोहरूका बारेमा जनकारी दिँदै गर्दा अरू कुनै जानकारी दिइएको छैन । निर्देशक नै तय गर्न नसकेको निर्माण पक्षले यस फिल्मबाट सलिनको कमव्याक कस्तो गराउला भन्ने प्रश्न उब्जिएको छ ।
यता, निर्माण पक्षले निर्देशक र अभिनेत्रीको टुंगो लाग्न बाँकी रहेको भन्दै सलिनले ५ वर्षपछि कमब्याक गर्न लागेको चर्चा र फिल्म प्रचारमा थप मद्दत होस् भन्ने चहाना राखेको थियो । तर, सलिनका समर्थमाझ यो प्रकारको प्रचार फण्डा समेत फिक्का परेको छ ।
