फिल्म ‘उपहार’को शीर्ष गीत ‘हारेको छैन’ सार्वजनिक भएको छ ।
फागुन २५ गतेबाट प्रदर्शनको तयारीमा रहेको फिल्मको तेस्रो अर्थात् टाइटल गीत सार्वजनिक गरिएको हो । गीतमा रविन भुसालको स्वर, अर्जुन पोखरेलको संगीत तथा प्रमोद ढुंगानाको शब्द रहेको छ ।
ज्ञानेन्द्र देउजाको निर्देशनमा निर्माण भएको फिल्मको गीतमा अभिनेत्री रेखा थापा, बेनिशा हमाल, पूजा शर्मा, मुकुन भुसाल, सुष्मा कार्की फिचर्ड छन् । गीतको अडियो र भिडियो पक्ष बलियो छ । गीतका शब्द सजिलै सम्झन सक्ने खालका छन् ।
कविराज गहतराजको कोरियोग्राफी रहेको गीतको भिडियोमा फिल्मका सबै कलाकारहरूलाई भावुक अवतारमा देखाइएको छ । साथै, यो गीतको भिडियोले फिल्मका मुख्य पात्रहरूको चरित्र पनि देखाएको छ ।
‘उपहार’ सामाजिक विषयवस्तुमा आधारित रहेकाले फिल्ममा हाँस्यरसदेखि रोदनसम्म सबै कुराको समिश्रण रहेको निर्देशक देउजा बताउँछन् ।
फिल्ममा रेखा, बेनिशा, पूर्जा र मुकुनका अलावा तेज गिरी, समर्पणजंग कार्की, अंशु महर्जन, आशा भुषाललगायतको पनि अभिनय रहेको छ ।
रेखा फिल्मस् र कपनगढी फिल्मस्को ब्यानरमा निर्माण भएको फिल्मको निर्माता सुलभ प्रतीक र समीक्षा देउजा हुन् । यस फिल्मको कार्यकारी निर्माता बलराम शाही ठकुरी रहेका छन् ।
विष्णु कल्पित घिमिरेको छायांकन, अर्जुन पोखरेल र बाबुल गिरीको संगीत, मित्र डि गुरुङको सम्पादन, सुलक्षण भारतीको कथा, भारतीका साथै अभिमन्यु निरवी र माधव शर्माको पटकथा तथा संवाद, अनुपम गौतमको भीएफएक्स र रोशन श्रेष्ठको द्वन्द्व निर्देशन छ ।
