साउथ सुपरस्टार अल्लु अर्जुन यतिबेला ‘पुष्पा २’ को सुटिङमा व्यस्त छन् । बहुप्रतिक्षित फिल्मको छायांकन यतिबेला हैदराबादमा धमाधम भईरहेको छ ।
यसअघि फिल्मका कलाकार जगदीश प्रताप भण्डारीलाई हैदरावाद प्रहरीले जुनियर महिला कलाकारलाई आत्महत्या गर्न उक्साएको आरोपमा पक्राउ गरेपछि छायांकन केही दिन रोकिएको थियो ।
‘पुष्पा’मा जगदीशले महत्वपूर्ण भूमिका निर्वाह गरेका छन् । फिल्ममा जगदीशको भूमिकाको नाम केशव रहेको छ ।
जगदीश पक्राउ परेका कारण केही दिनको लागि छायाकंन रोकिए पनि अहिले फिल्मको छायांकन पुनः सुरु भएको छ । जानकारी अनुसार महिला कलाकारले गत वर्ष नोभेम्बर २३ मा आत्महत्या गरेकी थिइन् । यसपछि प्रहरीले डिसेम्बर ६ मा जगदीशलाई पक्राउ गरेको थियो ।
अभिनेता जगदीशलाई अदालतले उक्त मुद्दामा जमानत दिएको छ । अभिनेता सेटमा फर्किएसँगै अहिले समयमै छायांकन सम्पन्न गर्ने गरि तीव्र गतिमा काम भइरहेको छ । आरएफसीका अनुसार फिल्मको सुटिङ दुई ठाउँमा भइरहेको छ ।
पुष्पा २’का निर्माताहरु रिलिज मितिमा ढिलाइ चाहँदैनन् र त्यही भएर छायांकनमा तिव्रता दिइरहेका छन् । यो फिल्मको छायांकन गर्न ठूलो संख्यामा यूनिट टोली खटिरहेको छ । दुई फरक ठाउँमा फिल्मको छायांकन भइरहेकाले पूर्ण टिमका तयारीका साथ छायांकनमा व्यस्त छ ।
सुकुमारद्वारा निर्देशित ’पुष्पाः द रुल’ अगस्ट २०२४ मा रिलिज हुने तयारीमा छ । ‘पुष्पा २’का निर्माताले विशेष पोस्टरसहित फिल्मको प्रदर्शन मिति पुनः पुष्टी गरेका छन् । बहुप्रतिक्षित बनेको यो फिल्म अगस्ट १५ मा विभिन्न भाषामा रिलिज हुँदैछ ।
निर्देशक सुकुमारको ’पुष्पाः द राइज’ डिसेम्बर २०२१ मा रिलिज भएको थियो र त्यो वर्षको सबैभन्दा धेरै कमाउने फिल्महरू मध्ये एक बनेको थियो ।
फिल्ममा अल्लु अर्जुन, फहद फासिल र रश्मिका मन्डन्ना मुख्य भूमिकामा छन् । यस फिल्ममा राष्ट्रिय पुरस्कार विजेता देवी श्री प्रसादको संगीत रहेको छ ।
