काठमाडौं । नायक पुष्प खड्काका विं.सं. २०७९-८० मा तीनवटा फिल्म रिलिज भए । जसमा ‘कृष्णलीला, मनसँग मन र तिम्रो मेरो साथ’ रहेका थिए । यी तीनवटै फिल्मले बक्स अफिसमा पानी पनि भन्न पाएनन् ।
फिल्म बक्स अफिसमा तीनवटै फिल्म नराम्रोसँग चिप्लिएपछि उनी यतिबेला म्युजिक भिडियोमा निकै व्यस्त देखिदै छन् । पुष्पको हातमा म्युजिक भिडियोको कुनै कमी छैन । उनका हप्तैपिछे नयाँ नयाँ म्युजिक भिडियोहरु सार्वजनिक भइरहेका हुन्छन् । उनले म्युजिक भिडियोबाट राम्रो पैसा पनि कमाइरहेका छन् ।
तर, म्युजिक भिडियोमा उनको जति व्यस्तता छ, फिल्ममा भने उनी साम्मसुम्म जस्तै छन् । यता, फिल्मले निरन्तर असफलता भोगेपछि पुष्प खड्का अब कहिले अर्को फिल्म गर्लान भन्ने कौतुहलता उनका सकर्थक माझ छुटै छँदैछ ।
यो एक वर्षको समयमा उनले कुनै नयाँ फिल्म साइन गरेका छैनन् । पुष्पका यस अघिनै घोषणा भएका फिल्म समेत बन्न सकेनन् । यता, तीनवटै फिल्म नचलेपछि उनले नयाँ फिल्म साइन गर्न डराइरहेका हुन् कि भन्ने छुट्टै चासोको विषय रहेको छ ।
पुष्पको सुरुवाती चरणमा उनले अभिनय गरेको ‘मंगलम’ फिल्मबाट चौतर्फी तारिफ भएको थियो । उनले यो फिल्मबाट ‘राष्ट्रिय फिल्म अवार्ड’ समेत जितेका थिए ।
