काठमाडौं । सरस्वती पूजा तथा भ्यालेन्टाइन डेकाे अवसर पारेर फिल्म ‘मेयर’काे मुहुर्त गरिएको छ । राजधानीको दरबारमार्गस्थित नारायणहिटी मन्दिरमा फिल्मकाे मुहुर्त गरिएको हो ।
यो फिल्म सर्लाहीस्थित बागमति नगरपालिकाका वर्तमान मेयर भरत थापाको जीवन संघर्षलाई आधार मानेर तयार पारिनेछ ।
फिल्मका कार्यकारी निर्माता तथा निर्देशक दीपेन्द्र के खनाल हुन् । ‘केही राम्रो काम गरेरै छोड्छु भन्ने दृढ सपना भएको मान्छेले कठिन परिस्थिति, घात प्रतिघातका बीचमा पनि संघर्ष गरेर समाजलाई आर्थिक, सामाजिक र शैक्षिकरुपमा कसरी राम्रो बाटोमा डोऱ्याउन सक्छ भन्ने विषयमा फिल्म केन्द्रित हुनेछ’, उनले भने ।
फिल्ममा शीर्ष भूमिकामा अभिनेता खगेन्द्र लामिछाने रहनेछन् भने उनको अपोजिटमा वर्षा राउत छिन् ।
त्यस्तै, अर्पण थापा, अनुप बराल, दिव्यदेव, प्रकाश घिमिरे, हरिहर शर्मा, रवीन्द्र झा, रमेश बुढाथोकी, अविंशा चापा, सञ्जोग रसाइली, आशान्त शर्मा, प्रभाकर न्यौपाने, झकेन बिसी लगायत अन्य कलाकारले फिल्ममा अभिनय गर्नेछन् ।
फिल्मबाट निर्माताको रुपमा बृष्टिमां खनाल र कलाकारको रुपमा अविंशा थापाले डेब्यू गर्दैछन् ।
फिल्म पटकथा प्रडक्शनले निर्माण गर्न लागेको हो। शर्मिला पाण्डे र श्रृष्टिमा खनाल निर्माता रहेको फिल्ममा महेश दवाडीकाे पटकथा लेखन, कृष्णबहादुर थापाकाे छायांकन, जयन जे बाइवा र कल्याण सिंहको संगीत हुनेछ।
