काठमाडौं । फागुनको २५ गतेबाट रिलिजमा आउन लागेको फिल्म ‘उपहार’को ट्रेलर सार्वजनिक गरिएको छ ।
ज्ञानेन्द्र देउजाको निर्देशनमा तयार भएको फिल्मको ट्रेलरमा प्रेम, रोदन, खुसी, पीडा र कमेडीको समिश्रण रहेको देख्न सकिन्छ ।
फिल्मका मुख्य तीन महिला पात्रको कथा देखाइएको ट्रेलरमा समाजको मुद्दालाई केन्द्र बनाएको छ । जहाँ, महानगरपालिकाले लगाउँदै आएको डोजर र ठेला चलाएर व्यापार गर्नेहरूको कथा उठान गरेको बुझ्न सकिन्छ । ट्रेलरमा फिल्मकी मुख्य अभिनेत्री रेखा थापा चियावालीको रूपमा चित्रित छन् । मुकुन भुषाल ट्याक्सी ड्राइभर बनेका छन् । यस्तै, अभिनेत्री पूजा शर्मा चुलबुले चरित्रमा देखिएकी छिन् । अर्की अभिनेत्री बेनिशा हमाल वकिलको भूमिकामा रहेको देख्न सकिन्छ । अर्का अभिनेता तेज गिरी बेनिशाका पतिका रूपमा रहेका छन् ।
फिल्मका यी तीन पात्रको आ–आफ्नै कथा रहेको बुझ्न सकिन्छ । कमेडी संवाद हाबी रहेको ट्रेलर हेर्दा अभिनेत्री सुष्मा कार्कीलाई चट्नीको रूपमा प्रस्तुत गरिएको छ ।
रेखा फिल्मस् र कपनगढी फिल्मस्को प्रस्तुतिमा तयार भएको फिल्ममा रेखा थापा, पूजा शर्मा, बेनिशा हमाल, मुकुन भुसाल, तेज गिरी, समर्पण जंग कार्की, शिशिर राना, सुष्मा कार्की, अंशु महर्जन लगायतका कलाकारको अभिनय छ ।
बलराम शाही ठकुरी कार्यकारी निर्माता रहेको फिल्मका निर्माता सुलभ प्रतीक र समीक्षा देउजा हुन् । फिल्ममा विष्णु कल्पित घिमिरेको छायांकन, सुलक्षण भारतीको कथा, भारतीसँगै अभिमन्यु निरवी र माधव शर्माको पटकथा तथा संवाद छ ।
अर्जुन पोखरेल र बाबुल गिरीको संगीत रहेको फिल्ममा कविराज गहतराजको कोरियोग्राफी, रोशन श्रेष्ठको द्वन्द्व निर्देशन, विष्णु कल्पितको छायांकन छ ।
सुलक्षण भारतीको कथा रहेको फिल्ममा सुलक्षणको साथमा अभिमन्यु निरवी र माधव शर्माको पटकथा तथा संवाद छ । फिल्ममा मित्र डी गुरुङको सम्पादन छ ।
