काठमाडौं । निर्देशक घनश्याम लामिछाने निर्देशित फिल्म ‘लन्डन टु पेरिस’को छायांकन सम्पन्न भएको छ ।
फिल्मको पहिलो सेड्यूलको छायांकन बेलायतमा गरिएको थियो । यसपछि, बाँकी रहेको २० प्रतिशत छायांकन मुम्बईमा गरिएको हो ।
कोरोना लगत्तै दोश्रो चरणको छायांकन सकेको फिल्मको प्राविधिक गर्दा कारणले सुटिङ हुन बाँकी थियो ।
निर्देशक लामिछानेका अनुसार एउटा गीतको आधा जति र केही दृश्य बाँकी रहेको थियो । यतिबेला छायांकन सकिएसँगै धमाधम मुम्बईमा सम्पादनको काम चलिरहेको उनले जानकारी दिएका छन् ।
‘एक वर्षपछि सम्पूर्ण छायाङ्कन ढिलै गरी राम्रै भएकाले म पनि खुशी छु । कहिलेकाहीँ फिल्म ढिला हुँदा फिल्म रोकिने नबन्ने गरेकोमा ढिला नै भएपनि हामीले फिल्म पूरा गर्न सक्यौं । यसमा म खुशी छु’, निर्देशक लामिछानेले भने ।
आफ्नो छायाङ्कन सकेर अभिनेत्री साम्राज्ञी राज्यलक्ष्मी शाह र डेब्यू अभिनेता निश्चल खड्का भारतको मुम्बईबाट नेपाल फर्किसकेका छन् । फिल्मको अन्तिम सम्पादन सकिएपछि रिलिज डेट घोषणा गर्ने तयारी रहेको छ ।
फिल्मको पहिला खिचेको भागको डबिङ र कलर समेत भैसकेको छ भने मिक्सिङ तथा भिएफएक्सको काम अहिले खिचेको दृश्यहरुको डबिङ सकिएपछि हुनेछ । गरिमा शर्मा र कबीर खड्काको पनि मुख्य भुमिका रहेको ट्राभल लभस्टोरीको कथामा निर्माण हुन लागेको फिल्मको सम्पूर्ण छायांकन बेलायतमा गरिएको छ । निश्चल र गरिमा यही फिल्मबाट डेब्यू गर्दैछन् ।
एबी इन्टरनेशनलको ब्यानरमा निर्माण भएको फिल्मको कथा, पटकथा र संवाद प्रदीप भारद्वाजले लेखेका हुन् । फिल्मको निर्मातामा अमित बस्नेत, अजित कुमार थापा, परी राना, अंकित गौतम, सनिश खकुरेल र सह–निर्मातामा अजित सिंह छन् ।
