काठमाडौं । कीर्तिपुरस्थित त्रिवि क्रिकेट मैदानमा जारी आईसीसी विश्वकप लिग–२ क्रिकेटअन्तर्गत त्रिकोणात्मक शृङ्खलाको दोस्रो खेलमा नेपालले १३८ रनको लक्ष्य पाएको छ । नेदरल्यान्ड्सलाई १३७ रनमा अलआउट गराउँदा नेपालले कम लक्ष्य पाएको हो ।
टस हारेर पहिला ब्याटिङ गरेको नेदरल्यान्ड्स ३९ ओभरमा अलआउट भयो । नेदरल्यान्ड्सका लागि कप्तान स्कट एडवार्ड्सले सर्वाधिक ३३ रन बनाए । बास डे लिडेले २७ रन तथा साइब्राण्ड एन्जलबच्र्टले २३ रन बनाए । कायल क्लाइनले नटआउट रहँदै ११ रन बनाएका थिए । नोआ क्रोएसले १२ रन बनाउँदा म्याक्स ओ डाउड र आर्यन दत्तले १०–१० रन मात्रै बनाउन सके ।
नेपालका लागि कुशल भुर्तेलले ४ विकेट लिए । ललित राजवंशीले २ विकेट लिए । सोमपाल कामी र रोहित पौडेलले १–१ विकेट लिन सफल भए ।
पहिलो खेलमा नेपाल नामिबियासँग ४ विकेटले पराजित भएको थियो । नेपालले प्रस्तुत गरेको १३३ रनको लक्ष्य नामिबियाले ३३.१ ओभरमा ६ विकेट गुमाएर भेट्टाएको थियो ।
