काठमाडौं । अख्तियार दुरुपयोग अनुसन्धान आयोगले मेलम्ची खानेपानी परियोजनामा भ्रष्टाचार गरेको अभियोगमा तीन पूर्वसचिवसहित १६ जनाविरुद्ध मुद्दा दायर गरेको छ ।
जसअनुसार मेलम्ची खानेपानी विकास समितिका तत्कालीन कार्यकारी निर्देशक सूर्य राज कँडेलले मात्रै झण्डै एक अर्ब रुपैयाँ भ्रष्टाचार गरेको आयोगका प्रवक्ता नरहरि घिमिरेले जनाएको छ ।
आयोगले कँडेलसँग मात्रै ८९ करोड ९ लाख रुपैयाँ बिगो दाबी गर्दै आइतबार विशेष अदालतमा मुद्दा दायर गरेको छ । यस्तै भ्रष्टाचारमा पूर्वसचिवहरू भीम उपाध्याय, सञ्जय शर्मा र गजेन्द्र ठाकुरविरुद्ध पनि मुद्दा दायर गरेको छ । उनीहरूले मेलम्ची खानेपानी आयोजना अर्बौं भ्रष्टाचार गरेको आयोगको ठहर छ ।
यस्तै, आयोगले भ्रष्टाचार निवारण ऐन, २०५९ को दफा १७ को कसुरमा सोही दफाले निर्देश गरेबमोजिम रहेर कारबाही माग गरेको छ । यसैगरी दफा २४ बमोजिम थप सजायको माग दाबी गरिएको छ ।
