काठमाडौं । गत सातादेखि नै शेयर बजार करिब निरन्तर ओरालोमा छ । योबीचमा बजारमा ६३ अंकको गिरावट आएको छ ।
२१ सयको बिन्दुमा चलिरहेको बजार अहिले २ हजारको वरिपरि छ । निरन्तरको गिरावटलाई हेर्दा, बजार पुनः २ हजारबाट पनि मुनि झर्ने अनुमान लगाउन सकिन्छ ।
यो साताको दुई दिनमा मात्रै बजारमा करिब २९ अंकको गिरावट आएको छ ।
यद्यपि, लगातारको गिरावटका बीच साताको दोस्रो कारोबार दिन मंगलबार बजार उठ्ने शैलीमा देखिएको थियो । करिब १७ अंकको उतार चढावका बीच बजार उक्लिने स्थितिमा देखिएको थियो ।
तर, अन्तिम कारोबारको समय बजारमा पुनः गिरावट आयो । १.७६ अंकले घट्दै मंगलबारको कारोबार बन्द भएको छ ।
मंगलबार कारोबारमा आएका २४९ कम्पनीमध्ये ९० कम्पनीको मूल्यमा बृद्धि भएको छ भने १५० कम्पनीको मूल्यमा गिरावट आएको छ । मंगलबार विकास बैंक, फाइनान्स, लगानी, उत्पादन तथा प्रशोधन र अन्य समूहमा बृद्धि भएको छ ।
