काठमाडौं । प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आज नयाँ राजनीतिक परिस्थितिको सिर्जना भएको बताएका छन् । शहीद सप्ताहको कार्यक्रममा पुगेका उनले यस्तो बताएका हुन् ।
प्रधानमन्त्री प्रचण्डले माओवादी जमेको पोखरी जस्ता जमेर नबस्ने बताउँदै देशमा उथलपुथल ल्याउने काममा लागिरहने बताए । ‘माओवादी सिद्धान्त र व्यवहारको दृष्टिकोणले जमेको पोखरी जस्तो हैन, गडगडाउँदो खोला जस्तो नदी हो,’ उनले भने, ‘यो निरन्तरमा रमाएर स्थिरमा बस्न सक्दैन, यो स्थिरतामा गडगडाउने जात हो माओवादी ।’
उनले आजको दिनमा भएको राजनीतिक परिवर्तन सानो कुरा नभएको बताउँदै धेरै ठूलो कुरा भएको बताए ।
‘म त म नै भैहालेँ, म नमर्दासम्म देशमा उथलपुथल भई नै राख्छ, मलाई घेरा हालेर सिध्याउन धेरै पटक प्रयास भए प्रतिक्रियाबाट, घेरा तोड्दै आएँ, तोड्दै जाने हो,’ उनले भने ।
