काठमाडौं । नागरिक उन्मुक्ति पार्टीले केन्द्र राजनीतिमा प्रतिपक्षीको भूमिका निर्वाह गर्ने निर्णय गरेको छ ।
बुधबार काठमाडौंमा पत्रकार सम्मेलन गर्दै अध्यक्ष रेशमलाल चौधरीले केन्द्रीय समितिको बैठकले आफूहरु अहिले सरकारमा सहभागी नहुने र प्रतिपक्षीमा रहने निर्णय गरिएको जानकारी दिए । चौधरीले केन्द्रीय समितिको बैठकले नै अहिले सरकारमा सहभागी नहुने निर्णय गरेको बताए ।
‘भर्खरै संसद भवनबाट फोन आएको थियो, विपक्ष र प्रतिपक्षमा कता बस्ने हो ? भनेर सोध्नु भएको थियो, हामी विपक्षीको बेञ्चमा बस्छौँ भन्या छौँ,’ अध्यक्ष चौधरीले भने ।
आफूहरु केन्द्रीय सरकारमा अहिले नगए पनि सुदूरपश्चिम प्रदेशमा दाबी रहेको उनको भनाइ थियो । उनले आफ्नो पार्टीले राजनीतिक अवस्थालाई केही समय हेर्ने र त्यसपछि आवश्यक निर्णय गर्ने धारणा राखे ।
यस्तै, चौधरीले टीकापुर घटनाका पीडितहरूले न्याय पाउनु पर्छ भन्नेमा आफू दृढ रहेको जिकीर गरे । टीकापुर घटनामा थारुहरू धेरै पीडित रहेको उनको दाबी थियो ।
