काठमाडौं । नेकपा एमालेका उपाध्यक्ष विष्णुप्रसाद पौडेलले संसदमा कुनै पनि दलको बहुमत नभएको अवस्थामा दलहरू मिलेर सरकार बनाइनु स्वभाविक भएको बताएका छन् ।
बिहीबार प्रतिनिधिसभाको बैठकमा बोल्दै पौडेलले कुनै निश्चित दलसँग मात्रै सत्ता सहकार्य हुनुपर्छ भन्ने कहीकतै नभएको भन्दै संसद्भित्र जुनसुकै दलबीच सहकार्य हुनु स्वभाविक प्रक्रिया भएको बताए ।
उनले वर्तमान सरकार र गठबन्धनले संसद्को बाँकी कार्यकाल पूरा गर्ने उल्लेख गरे । पौडेलले मुलुकको सुशासन, समृद्धि र सामाजिक न्यायका लागि नयाँ गठबन्धन बनेको भन्दै यसलाई अविचलित रुपमा अघि बढाउनु पर्ने बताए ।
यस्तै, उनले विगतको गठबन्धनका समस्यालाई खुलस्त रुपमा राखेर सहज र संविधानसम्मत रुपमा विकल्प खोज्ने काम प्रधानमन्त्रीबाट भएकाले सबै दलले यसलाई सहज र स्वभाविक रुपमा लिनु पर्ने धारणा राखे ।
उनले अहिले भएको सहयात्रा जनता र राष्ट्रका समस्यालाई सम्बोधनमा केन्द्रीत रहने बताए ।
