काठमाडौं । निर्देशक शोभितकी छोरी सलिना बस्नेत पनि अभिनयमा आउने भएकी छन् । उनले डकुड्रामा सिरिज ‘हामी छौं’बाट अभिनयमा डेब्यू गर्न लागेकी हुन् ।
कसले निर्देशन गर्ने भनेर टुंगो नलागेको डकुड्रा ‘हामी छौं’लाई सलिना र आर्यन पौडेलले मिलेर निर्माण गर्दै छन् । यो डकुड्रामामा उनीहरुको नै मुख्य भुमिका रहनेछ । सलोन सलिना फिल्मस्को ब्यानरमा निर्माण हुने डकुड्रामामा नाम चलेका निर्देशक नै लिने तयारी सलिनाको छ । निर्देशकको नाम चाँडै घोषणा गरिने बताइएको छ ।
सात एपिसोड रहने डकुड्रामाको हरेक एपिसोडमा अलग-अलग निर्देशक हुनेछन् । यसलाई सातजनाले निर्देशन गर्नेछन् । यो ड्रामाको छायांकनको लागि सलिना र आर्यन आगामी बैशाखमा नेपाल आउँदैछन् । उनीहरु दुवै जना लामो समयदेखि अष्ट्रेलियामा बस्दै आएका छन् । अहिले दुवैजना अस्ट्रेलियाको सोसल मिडियामा भाइरल छन् ।
यो डकुड्रामामार्फत सात प्रदेशबाट ७ जना अशक्त, आर्थिक रूपमा कमजोर व्यक्तिलाई छनोट गरिनेछ । जो वास्तविक जीवनमै पीडित छन् । हरेक मान्छेलाई हरेक एपिसोडमा आर्थिक सहयोग गर्ने तयारी सलिना र आर्यनको छ । डकुड्रामाको उद्देश्य आर्थिक रुपमा कमजोर, अशक्त मानिसलाई सहयोग गर्ने रहेको सलिनाले बताइन् ।
डकुड्रामाको संगीत शम्भुजित बास्कोटाले दिनेछन् भने गीत आनन्द अधिकारीले लेख्नेछन् । हाललाई यो ड्रामाको बजेट ५० लाख छुट्याइएको छ ।
