काठमाडाैं । नायक प्रदीप खड्काको हातमा एकपछि अर्को फिल्म थपिँदै गएका छन् ।
हालै निर्देशक दिनेश राउतको फिल्म ‘पूजार सार्की’को छायांकनमा व्यस्त रहेका प्रदीपले अर्को नयाँ अन टाइटल फिल्ममा साइन गरेका छन् ।
लामो समय देखि बेलायत बस्दै आएका निर्देशक प्रदीप शाहीको निर्देशनमा बन्ने यो अन टाइटल फिल्ममा प्रदीपले आफ्नो जन्मदिनको अवसर पारेर शनिबार निर्माण पक्षसँग सम्झौता गरेका हुन् ।
प्रदीप नयाँ अनुबन्धित भएसँगै उनी आउँदो वर्ष पनि पूर्ण रूपमा व्यस्त हुने देखिएका छन् । उनले वैशाखबाट फिल्म ‘एक्टर’को छायांकन सुरु गर्दै छन् । यसपछि प्रदीपका फिल्म ‘ऐरी र पीताम्बर’ पनि छन् । साथै, उनले सुदर्शन थापाको एक लभ स्टोरी फिल्ममा पनि काम गर्ने पक्का भइसकेको छ ।
निर्देशक शाहीको फिल्म ‘अन्तिम संस्कार’ गत वर्ष प्रदर्शनमा आएको थियो । शाइ प्रोडक्सन नेपालको ब्यानरमा निर्माण हुने यो फिल्ममा ह्याम्साएर एकाउन्टेनको सहकार्य रहेको छ । यो फिल्मको कथा निर्देशक शाहीले नै लेखेका हुन् । साई-फाई जोम्बी थ्रिलर जनरामा यो फिल्म निर्माण हुनेछ । यस्तै, फिल्ममा मिथिकल इलेमेन्टहरु पनि रहेको निर्देशक शाहीले जानकारी दिए ।
प्रदीप शाहीको निर्देशनमा बनेको पहिलो फिल्म ‘गोर्खा : बिनिथ द ब्रेभरी’ ले अमाजोन प्राइममा राम्रो दर्शक पाउन सफल बनेको थियो । नेपाली फिल्मको बजार नेपालमा मात्र नभई विदेशमा र विदेशी ओटीटी प्लेटफर्ममा पुर्याउनु पर्छ र नेपालीले पनि विदेशी लेभलको फिल्म बनाउन सक्छ भन्ने देखाउने सोच रहेको निर्देशक शाहीले बताएका छन् ।
फिल्मको अन्य कलाकार तथा प्राविधिक फाइनल हुन बाँकी रहेको कार्यकारी निर्माता विनोद सुवेदी खत्री ‘क्षितिज’ ले बताए ।
