काठमाडौं । रुसमा राष्ट्रपतीय निर्वाचनको मतदानका क्रममा आगजनी र हिंसा भइरहेका छन् । युक्रेनको सीमासँग जोडिएको बेल्गोरोड सहरमा भ्लादिमिर पुटिन विरोधी मानिसले धेरै ठाउँमा आगजनी गरेका छन् ।
सोही क्रममा राजधानी मस्कोका धेरै मतदान केन्द्रमा मानिसहरूले तोडफोड गरेका छन् । प्रहरीले हिंसामा संलग्न रहेको आशंकामा अहिलेसम्म ८ जनालाई नियन्त्रणमा लिएको छ ।
रुसमा राष्ट्रपतीय निर्वाचनका लागि मार्च १५ मा मतदान सुरु भएको थियो । पहिलो पटक तीन दिनसम्म मतदान हुँदैछ । कुनै पनि आपराधिक मुद्दामा जेल सजाय नपाएका रूसी नागरिकले मार्च १७ सम्म मतदान गर्न सक्ने छन् । साथै, मस्को समयअनुसार मार्च १७ रातिसम्म नतिजा सार्वजनिक गर्न सकिने छ ।
पुटिनले गरे अनलाइन भोट
राष्ट्रपति पुटिनले अनलाइनमार्फत भोट हालेका छन् । १४ मार्चमा रूसको निर्वाचन आयोगले भनेको थियो- देशमा ११.२३ करोड मतदाता छन् । यसमा रुसले कब्जा गरेको युक्रेनी क्षेत्रका नागरिकहरू पनि पर्छन् ।
यसबाहेक करिब १९ लाख मतदाता देश बाहिर छन् । यसपटक पनि रुसमा अनलाइन भोटिङको सुविधा हुनेछ । यो सुविधा रूस र क्रिमिया को २७ क्षेत्र मा हुनेछ । क्रिमिया युक्रेनको त्यही क्षेत्र हो । जुन सन् २०१४ मा रुसले कब्जा गरेको थियो ।
रुसको कब्जामा रहेका युक्रेनी सहरमा पनि मतदान
रुसबाहेक युक्रेनको डोनेस्क, लुहान्स्क, जापोरिझिया र खेरसन जस्ता क्षेत्रमा मतदान भइरहेको छ । सन् २०२२ मा युक्रेनविरुद्धको युद्ध सुरु भएपछि रुसले कब्जा गरेको ठाउँहरू हुन् ।
यद्यपि, मिडिया रिपोर्टका अनुसार यी क्षेत्रहरू पूर्ण रूपमा रुसको नियन्त्रणमा छैनन् । युक्रेन र पश्चिमी देशले यहाँ मतदानको निन्दा गरेका छन् । केही स्थानमा प्रारम्भिक मतदान सुरु भइसकेको छ ।
छैटौँ पटक राष्ट्रपति बन्दै पुटिन
न्युयोर्क टाइम्सका अनुसार चुनावअघि पुटिन फेरि राष्ट्रपति बन्ने निश्चित मानिन्छ । वास्तवमा, पुटिन विगत २४ वर्षदेखि रुसमा सत्तामा छन् । पुटिनका धेरैजसो विपक्षी अहिले जेलमा छन् वा निर्वाचन आयोगले उनीहरूलाई चुनावका लागि अयोग्य घोषित गरेको छ ।
यसबाहेक पुटिनले सन् २०२१ मा यस्तो कानून बनाएका थिए । जसअन्तर्गत उनी २०३६ सम्म रुसको राष्ट्रपति रहन सक्छन् । एजेन्सी
