काठमाडौं । यही चैत २३ गतेबाट प्रदर्शन हुन लागेको शोभित बस्नेत निर्देशित फिल्म ‘बद्री बहादुर’को ट्रेलर सार्वजनिक गरिएको छ ।
बिहीबार राजधानीमा आयोजित एक कार्यक्रमकाबीच सार्वजनिक गरिएको फिल्मको ट्रेलरमा सम्पूण कलाकारलाई स्थान दिइएको छ । कमेडी फ्लेवरमा तयार पारिएको ट्रेलर हेर्दा दुईअर्थी संवादलाई प्राथमिकता दिइएको छ भने फिल्म हास्य विद्यामा निर्माण भएको बुझ्न सकिन्छ। निर्माण टिमले धेरै हाँस्न नसक्ने दर्शकलाई फिल्म नहेर्न आग्रह समेत गरेको छ ।
फिल्मको ट्रेलर रिलिज कार्यक्रममा निर्देशक बस्नेतले ‘बद्री बहादुर’ दर्शकले मन पराउनेमा शतप्रतिशत ढुक्क रहेको बताए । यस्तै, फिल्मलाई बलिउड कमेडीयन कपिल शर्माले सफलताको शुभकामना समेत दिएका छन् ।
सञ्चारकर्मी तथा विकास बोर्डका सदस्य समेत रहेका रवि अधिकारी कार्यकारी निर्माता रहेको फिल्म एवी पिक्चर्स फार्म र सलोन सलिना फिल्मस्को ब्यानरमा निर्माण भएको हो । विजय गोपाल दली प्रस्तुतकर्ता र मिथुन भोटे फिल्मको निर्मातामा छन् ।
फिल्ममा जय किसन बस्नेत, एलिना गुरुङ, छुल्ठिम गुरुङ, राजीव जंग बस्नेत, धिरेन शाक्य, उत्तम केसी, वर्षा चौलागाई र निर्देशक शोभित बस्नेत स्वयं देखिएका छन् । फिल्मको एक गीतमा अभिनेता सलोन बस्नेत र अभिनेत्री पूजा शर्मा समेत फिचर्ड छिन् । उनीहरु फिल्मको यही गीतमा मात्र देखिनेछन् ।
फिल्ममा टंक बुढाथोकी र उजन नेम्वाङको संगीत, रामकाजी घिमिरे लेखन, शंकर महर्जनको द्वन्द्व निर्देशन, रामजी राउत र ज्ञान कुमार कट्टेलको मुख्य सहायक निर्देशन तथा समिर मियाँ सम्पादन छ । आरआर फिल्म्सले वितरण गर्ने फिल्मलाई काठमाडौं, लमजुङ्ग, धरान र संखुवासभा क्षेत्रमा छायांकन गरिएको हो ।
