काठमाडौं । नेपाल प्रहरीद्वारा सञ्चालित पेट्रोल पम्प अब २४ सैँ घण्टा सञ्चालन हुने भएका छन् ।
उपप्रधानमन्त्री एवं गृहमन्त्री रवि लामिछानेको निर्देशनपछि नेपाल प्रहरी र सशस्त्र प्रहरी बलद्वारा सञ्चालित नेपाल प्रहरीको केन्द्रीय कार्यालय नक्साल, सशस्त्र प्रहरी बलको प्रधान कार्यालय हल्चोक र कास्कीको पोखरामा सञ्चालित पेट्रोल पम्प २४ सैँ घण्टा सञ्चालन हुने भएका हुन् ।
उपप्रधानमन्त्री लामिछानेले पेट्रोल पम्प २४ सैँ घण्टा खुला गर्न आदेश दिएसँगै आजदेखि पम्पहरू खुला रहने नेपाल प्रहरीका केन्द्रीय प्रहरी प्रवक्ता तथा प्रहरी नायब महानिरीक्षक भीमप्रसाद ढकालले जानकारी दिए ।
यसअघि प्रहरीद्वारा सञ्चालित पेट्रोल पम्पहरू बिहान ६ बजेदेखि राति ११ बजेसम्म सञ्चालित हुँदै आएका थिए । उनले भने, “मन्त्री ज्यूले २४ सैँ घण्टा खुला गर्न आदेश दिनुभएसँगै हामीले पेट्रोल पम्प खुला गरेका छौँ ।”
