काठमाडौं । निर्देशक बाबु साहेव बलामीको निर्देशनमा निर्माण हुने फिल्म ‘साम्राज्य’को निर्माण घोषणा गरिएको छ । शुक्रबार राजधानीमा आयोजित एक कार्यक्रमका बीच फिल्मको औपचारिक निर्माण घोषणा गरिएको हो ।
फिल्ममा भोजपुरी अभिनेता कुन्दन भारद्धाज, देव सिंह, प्रशान्त ताम्राकार, अनुजा लेप्चाको मुख्य भुमिका रहनेछ । फिल्मको घोषणा कार्यक्रममा चलचित्र पत्रकार संघका अध्यक्ष समिर बलामी प्रमुख अतिथिको रुपमा उपस्थित थिए । उनले फिल्मलाई सफलताको शुभकामना समेत दिए ।
निर्देशक बलामीले फिल्म नेपाली र हिन्दी गरी दुई भाषामा रिलिज गरिने जानकारी दिए । उनको प्रदर्शनको तयारीमा रहेको फिल्म ‘देब वाणी’ पनि दुई भाषामा नै तयार गरिएको छ । हरि बहादुर घलेले खिच्ने फिल्ममा शंकर अधिकारी घायलले गीत रचना गर्नेछन् ।
अनुजा इन्टरटेनमेन्टको व्यानरमा निर्माण हुने फिल्ममा हिरा बहादुर लेप्चा र पूर्णिमा लेप्चाको लगानी रहनेछ । जुन ५ अर्थात् जेष्ठ अन्तिमबाट फ्लोरमा जाने इन्डो नेपाली फिल्ममा केही नेपाली र भारतीय कलाकार छनोटको चरणमा रहेको निर्माण टिमले जनाएको छ । एक्सन जनरामा निर्माण हुने फिल्मलाई उत्कृष्ट बनाउन कुनै कसर बाँकी नराख्ने निर्माता हिरा बहादुर लेप्चाले बताए ।
