काठमाडौं । फिल्म ‘डिग्री माइलाः एम ए थर्ड क्लास’ले दर्शकहरुको निकै ध्यान केन्द्रित गरेको छ । नयाँ वर्षको अवसर पारेर चैत्रको ३० गतेबाट प्रदर्शनमा आउन लागेकाे फिल्मले गफाडी प्रतियोगिता घोषणा गरेको छ।
रामबाबु गुरुङ निर्देशित यस फिल्मको निर्माण पक्षले शिर्षक पात्र ‘डिग्री माइला’ बनेर आफ्नै बारेमा गफ दिएर भिडियो पठाउन आव्हान गर्दै सर्वोत्कृष्ट हुनेलाई अनर ब्राण्डका मोबाइल पुरस्कार दिने जनाएको छ।
घोषणा अनुसार प्रतियोगितामा भाग लिने प्रतियोगीले ‘डिग्री माइला’ पात्र बनेर आफ्नै गफ दिदैं भिडियो बनाउनुपर्नेछ। सो भिडियो अधिक्त्तम ३ मिनेट सम्मको हुनुपर्नेछ। यस्तै कम्पनीको बासुरी फिल्मस् नामक यूट्यूब च्यानलसमेत सस्क्राइब गरेको हुनुका साथै पोस्ट गरिएको भिडिओमा ‘डिग्री माइला’ फिल्मको नाम र रिलिज मिति लेखिएको हुनुपर्ने बताएको छ।
सहभागी हुने प्रतियोगीले निम्न ह्यासट्याग प्रयोग गर्नुपर्नेछ। #DailogueCompetition #DegreeMaila #Chaitra30 यसरी बनाइएको भिडियोलाई निर्माण गर्ने कम्पनी बासुरी फिल्मस्लाई ट्याग गर्दै फेसबुकमा पोस्ट गर्नुका साथै [email protected] मा इमेल गर्नुपर्नेछ।
प्रतियोगीले चैत २७ गतेसम्म आफ्नो भिडियो माथि उल्लेखित सर्तहरु पूरा गर्दै पोस्ट गरिसक्नुपर्नेछ। यस प्रतियोगिताका विजेताले अनर मोबाइलको ‘एक्स नाइन बि फाइभजी’ पुरस्कारस्वरुप पाउनेछन् भने दोश्रो र तरेश्रो हुनेले क्रमश: ‘एक्स एट बि’ तथा ‘एक्स सेभेन बि’ मोडलको मोबाइल प्राप्त गर्नेछन्। यसका अलावा सन्त्वना पुरस्कारस्वरुप यो फिल्मको ५० वटा टिकट प्रदान गरिनेछ।
बाँसुरी फिल्मस्को प्रस्तुतिमा सुष्मा प्रोडक्शनको सहकार्यमा निर्माण भएको यो फिल्ममा दयाहाङ राई, आँचल शर्मा, माओत्से गुरुङ, प्रकाश घिमिरे, विजय बराल, बुद्धि तामाङ, कमलमणी नेपाल, शेखर चापागाँई, हिउँवाला गौतम लगायतका कलाकारको अभिनय छ ।
फिल्ममा विशाल गुरुङ, मणिराम पोखरेल, मधु मिजार, सुष्मा गुरुङको लगानी छ । फिल्ममा कृष्ण लामा कार्यकारी निर्माताको रुपमा छन् । शिवराम श्रेष्ठ र रिले एस सेनको छायांकन रहेको फिल्ममा निमेष श्रेष्ठको सम्पादन, रेनशा वान्तवा राइको कोरियोग्राफी छ ।
