काठमाडौं । गायक सुमन बिटीको ‘तिमी बिना सक्दिन’ बोलको गीत सार्वजनिक भएको छ । शनिबार बालाजुस्थित सगुन क्याफेमा आयोजित कार्यक्रमबीच गीतको भिडिओ सार्वजनिक भएको हो । गीतमा सुमनसँगै अन्नु चौधरीको स्वर रहेको छ ।
राष्ट्रिय लोक सञ्चारकर्मी नेपालले आयोजना गरेको विमोचन कार्यक्रमका प्रमुख अतिथि राष्ट्रिय संगीतकर्मी संघ नेपालका कार्यवाहक अध्यक्ष गायक प्रकाश कटुवालले गीतको अडिओ र भिडिओको क्वालिटीको तारिफ गरे ।
‘गीतको भिडिओ निर्माणका लागि मुस्ताङ पुग्नु भएको रहेछ, अडिओअनुसार भिडिओ निर्माणमा कुनै कमी भएको देखिदैन, गीतको सफलताको शुभकामना दिन चाहन्छु,’ प्रमुख अतिथि कटुवालले भने, ‘साथै गायक सुमन जी यसअघि पनि निकै राम्रो गीत दर्शक तथा स्रोतामाझ ल्याइराख्नु भएको सर्जक हुनुहुन्छ, यो गीत पनि लोकप्रिय बन्ने देख्छु ।’
कार्यक्रमका सभापति आयोजक संस्थाका अध्यक्ष सञ्चारकर्मी चन्द्रमणि गौतमले दिनहुँ दर्जनौँ गीतको भिडिओ सार्वजनिक भइरहेको अवस्थामा फरक र सुन्दर गीत ल्याएकोमा गायक सुमनलाई बधाई दिए ।
गीतको भिडिओमा गायक सुमन स्वयको अभिनय रहेको छ । सुमनसँगै अभिनयमा अश्विनी शाहीले साथ दिएकी छन् । यस्तै गीतमा रविन भुसालको लय र शब्द रहेको छ । एरेञ्ज विशाल निरौलाले गरेका हुन् ।
अपर मुस्ताङमा तीन दिन लगाएर भिडिओलाई दिनेश पराजुलीको टिमले खिचेको हो भने कोरियोग्राफी र निर्देशन विशाल नेपालीले गरेका छन् । भिडिओ सम्पादनको काम अमृत चापागाईंले गरेका छन् ।
गायक सुमनले गीतमा लगानी धेरै भएको बताए । उनी भन्छन्, ‘यति नै लगानी भएको भनेर संख्यामा भन्नु भन्दा पनि ठाउँको हिसाबले पनि लगानी धेरै भएको छ, तीनदिन पूरा मुस्ताङमा बसेर छायांकन गरेका हौँ, हाम्रो चाहना भिडिओ राम्रो बनाउँ भन्ने हो ।’
गायक सुमनले शुक्रबार नै युट्युवमा भिडिओ अपलोड गरेर विमोचन कार्यक्रम शनिबार राखेको जानकारी दिए ।
