काठमाडौं । प्रदीप शाहीको निर्देशनमा निर्माण हुन लागेको फिल्म ‘एक्लो’मा कलाकारको लाइनअप पुरा भएको छ ।
साई फाई जोम्बी थ्रिलर फिल्ममा नायक प्रदीप खड्का, नायिका बेनिशा हमालदेखि कलाकारहरू सुनिल थापा, विजय लामा, राज उप्रेती तथा कविता नेपालीलाई फाइनल गरिएको निर्माण पक्षले बताएको छ ।
यो फिल्ममा दिया पुनको विशेष भूमिका रहनेछ भने नृत्य रियालिटी शो ‘बुगी बुगी’को नेपाली संस्करणको प्रथम विजेता कविता नेपालीले डेब्यू फिल्म हुने भएको छ।
यता, यस फिल्ममा प्रदीप र बेनिशाले फिल्मी पर्दामा पहिलो पटक जोडीका रूपमा सहकार्य गर्ने भएका छन् ।
निर्माणपक्षले उनीहरूलाई फिल्ममा अनुबन्धित गरे पनि नाम भने लुकाउँदै आइरहेको छ । माग १० गते चलचित्र बिकास बोर्डमा दर्ता भएको यस फिल्मको मुख्य अभिनेत्रीमा दिया पुनको नाम समावेश गरिएको छ । यता, टिमले फिल्मको मुख्य अभिनेत्री बेनिशा रहेको जानकारी गराएको छ ।
फिल्ममा प्रदीप शाहीकै कथा रहने छ । शाइ प्रोडक्शन नेपालको ब्यानरमा निर्माण हुन लागेको यो फिल्ममा ह्रयाम्साएर एकाउन्टेनको पनि सहकार्य छ ।
विनोद सुवेदी खत्री ‘क्षितिज’ कार्यकारी निर्माता रहेको फिल्ममा दुई प्रदीपबीचको सहकार्यले नेपाली फिल्मका दर्शकले नयाँ स्वादको कथा हेर्न पाउने अपेक्षा गरिएको छ । नायक प्रदीप खड्काले लगालग फिल्म साइन गरिरहेका छन् । उनले, आफूलाई हरेक प्रकारको फिल्ममा ढाल्न खोजेको देखिन्छ ।
यस्तै, गतबर्ष ‘अन्तिम संस्कार’ नामक फिल्म निर्देशन गरेका निर्देशक शाहीले पनि फरक खालका पात्र प्रधान फिल्ममा आफूलाई ध्यान दिएको देखिएको छ । फिल्मको निर्माण पक्षले कलाकारको पनि लाइनअप पुरा गरेर प्रि प्रोडक्शनको तयारी धमाधम गरिरहेको छ ।
फिल्मको छायांकन आगामी वर्षको वैशाखपछि सुरु गर्ने निर्माण पक्षको योजना रहेको छ ।
