काठमाडौं । साताको दोस्रो कारोबार दिन सोमबार पनि शेयर बजारमा गिरावट आएको छ । सोमबार ६.२६ अंकले घट्दै बजार २०१२.०७ को बिन्दुमा ओर्लिएको छ । समग्रमा बजारमा ०.३१ प्रतिशतले गिरावट आएको नेपाल स्टक एक्सचेन्जले जनाएको छ ।
लगातार गिरावटका बीच शेयर बजारमा कारोबार रकम पनि घटेको छ । ७२ लाख ९० हजार दुई सय कित्ता शेयर खरिद–बिक्री हुँदा कारोबार रकम दुई अर्ब ८७ करोड ४७ लाख रुपैयाँ बराबरको भयो ।
जुन आइतबारको तुलनामा कम हो । आइतबार शेयर बजारमा कारोबार रकम तीन अर्ब रुपैयाँ बढीको भएको थियो ।
घटेको बजारमा सोमबार अधिकांश कम्पनीको मूल्यमा पनि गिरावट आएको छ । स्टक एक्सचेन्जका अनुसार सोमबार कारोबारमा आएका २४५ मध्ये १५१ कम्पनीको मूल्यमा गिरावट आएको नेपाल स्टक एक्सचेन्जले जनाएको छ ।
यस दिन ८६ कम्पनीको मूल्यमा सामान्य बृद्धि हुँदा ८ कम्पनीको मूल्य भने स्थिर रह्यो ।
सोमबार यसअघि जस्तै सर्वोत्तम सिमेन्ट, सिबम् सिमेन्ट, गुराँस फाइनान्सको कारोबार उच्च रहेको छ । सर्वोत्तम सिमेन्टको पाँच लाख १४ हजार कित्ता शेयर किनबेच हुँदा कारोबार रकम ४७ करोड २९ लाख १७ हजार रुपैयाँ बराबरको भयो ।
