काठमाडौं । गायक राजेश पायल राईले चैत्र १५ गते बिहीबार काठमाडौं जिल्ला अदालतमा श्रीमती साङबुङ राईसँग औपचारिक रुपमा सम्बन्ध विच्छेद गरेका छन् ।
जिल्ला अदालत काठमाडौंका अनुसार उनीहरूले मिलापत्रमा सम्बन्ध विच्छेद गरेका हुन् । अदालतमा गायक राई आफैले डिभोर्सको मुद्दा दायर गरेका थिए ।
सम्बन्ध विच्छेद गर्नका लागि गायक राईले गत साउन २१ गते मुद्दा दायर गरेका थिए । मुद्दा दायर भएको लामो समयपछि उनीहरूले सहमतिमा सम्बन्ध विच्छेद गरेका हुन् ।
जिल्ला न्यायाधीश पदमराज पाण्डेयको इजलासमा उनीहरूको सम्बन्ध विच्छेद भएको हो ।
यस क्रममा गायक राईले श्रीमतीलाई झण्डै पाँच करोड रुपैयाँ पर्ने तीन तले घर दिने भएका छन् । नक्सालमा रहेको उक्त घरसहित राईले श्रीमती साङ्गवुङ राईलाई थप नगद दिने सहमति गरेका छन् ।
साथै, थप एक करोड रूपैयाँ र काठमाडौंभित्रै रहेको एउटा घडेरी पनि लिने दिने लिखित सहमति भएको बुझिएको छ ।
उनीहरूको दुई वर्षीय छोरा छन् । छोराको सबै पालन पोषणसहित शिक्षाको जिम्मेवारी गायक राईले लिने भएका छन् । उनीहरुले छोरा जन्मिएपछि विं।सं। २०७८ असोजमा बिहे दर्ता गरेका थिए ।
आफूभन्दा २६ वर्ष कान्छी साङ्गवुङसँग दुई वर्षसम्म राजेश पायलको गोप्य अफेयर चलेको थियो । उनीहरूको भेट हुँदा राजेशपायल ४० काटिसकेका थिए । साङ्गवुङ उमेरले नाबालिग नै थिइन् ।
फ्यानको रूपमा नजिकिएकी साङ्गवुङलाई राजेश पायलले पछि प्रेमिका बनाए । उनीहरूबीच छोरा जन्मिएपछि श्रीमतीका रुपमा घरमै ल्याएर राखेका थिए । तर विवाह भएको थिएन । बच्चा जन्मिएपछि उनीहरूको विवाद दर्ता भएको थियो ।
