काठमाडौं। दक्षिण भारतीय अभिनेत्री रश्मिका मन्दाना आज आफ्नो २८ औं जन्मदिन मनाइरहेकी छिन् । फिल्म ‘पुष्पा २: द रुल’का निर्माताले यस अवसरमा रश्मिकाको फर्स्टलुक सार्वजनिक गरेका छन्, जसलाई दर्शकले निकै रुचाएका छन् ।
रश्मिकाका फ्यानलाई उपहार दिँदै निर्माण टिमले फिल्मकी अभिनेत्रीको फर्स्ट लुक सार्वजनिक गरेको हो। ‘पुष्प २: द रुल’मा रश्मिका श्रीवल्लीको भूमिकामा देखिनेछिन् ।
सार्वजनिक पोस्टरमा रश्मिकाले हरियो साडी लगाएकी छिन् । कपाल बाँधिएको, नाकमा औंठी लगाएको र भारी गहना लगाएको ‘श्रीवल्ली’को यो लुक हेर्न लायक छ । सिन्दुर लगाएकी श्रीवल्ली आँखाको छेउमा हात राखेर सिग्नेचर पोज गरिरहेकी छिन्।
फिल्ममा अल्लु अर्जुन मुख्य भूमिकामा छन् भने उनको अपोजिटमा रश्मिका देखिएकी छिन् । सन् २०२१ मा अल्लु अर्जुन र रश्मीकाले आफ्नो करियरको सबैभन्दा ठूलो हिट फिल्म ‘पुष्पाः द राइज’ दिएका थिए। यो फिल्मले उनीहरुलाई भारतसँगै विश्वभर स्टार बनायो। पहिलो भागमा दुबैको केमेस्ट्रीलाई दर्शकले रुचाएका थिए ।
‘पुष्पाः द राइज’ रिलिज भएको तीन वर्षपछि निर्माताले अब यसको दोस्रो भाग पुष्प २: द रुल ल्याइरहेका छन् । केही दिनअघि फिल्म ‘पुष्पा-२’ को अल्लु अर्जुनको नयाँ पोस्टर सार्वजनिक भएको थियो । यस फिल्म को टिजर अल्लु अर्जुनको जन्मदिनमा रिलिज हुने भएको छ ।
फिल्म ‘पुष्पा : द रुल’ का लेखक तथा निर्देशक सुकुमार हुन्। यो फिल्ममा अल्लु अर्जुन र रश्मिका अलावा फहद फासिल पनि महत्वपूर्ण भूमिकामा देखिने छन् ।
यो एक्शन थ्रिलर फिल्मलाई यसै वर्षको अगस्ट १५ मा रिलिज हुनेछ । मूल भाषा तेलुगु बाहेक, ‘पुष्पा २’ हिन्दी, तमिल, कन्नड र मलयालम भाषाहरूमा पनि रिलिज बताइएको छ।
