काठमाडौं । कर्णाली भ्रमणमा निस्किएका पूर्वराजा ज्ञानेन्द्र शाह जुम्ला पुगेका छन् । जुम्लामा पूर्वराजालाई राष्ट्रिय प्रजातन्त्र पार्टी (राप्रपा)का प्रवक्ता एवं सांसद ज्ञानेन्द्र शाहीसहितको टोलीले स्वागत गरेका थिए ।
जुम्ला विमान स्थलबाट कृष्ण मन्दिरसम्म गाडीमा पुगेका पूर्वराजा शाह चन्दननाथ मन्दिरसम्म पैदलनै हिँडेर समर्थकसँग भेटघाट गरेका थिए । कृष्ण मन्दिरबाट चन्दननाथ मन्दिरसम्म पैदलयात्रा गरेका शाहलाई उनका समर्थक र स्थानीयले अभिनन्दन गरेका थिए ।
टुँडिखेलमा सार्वजनिक कार्यक्रम गरेर पूर्वराजा शाहलाई नागरिक अभिनन्दन गर्ने तयारी भए पनि उक्त कार्यक्रम गर्न स्थानीय प्रशासनले रोक लगाएपछि चन्दननाथ मन्दिर नजिकैको सडकमै कार्यक्रम गरिएको हो ।
टुँडिखेलमा कार्यक्रम गर्न प्रशासनले अनुमति प्रदान नगरेपछि पूर्वराजाका समर्थक, स्थानीय नागरिक तथा राष्ट्रिय प्रजातन्त्र पार्टीका कार्यकर्ताले विरोध प्रदर्शन समेत गरेका थिए ।
पूर्वराजा शाहको जुम्ला भ्रमणलाई राप्रपाका प्रवक्ता शाहीले संयोजन गरेका छन् । यस क्रममा पूर्वराजाले चन्दननाथ र भैरवनाथको दर्शन गर्नुका साथै स्थानीय नागरिकका गुनासो सुन्ने कार्यक्रम छ ।
