काठमाडौं । अभिनेता प्रदीप खड्का अभिनेत्री बेनिशा हमालको मुख्य भूमिका रहेको साईफाई-जोम्बी थ्रिलर फिल्म ‘एक्लो १’को थिम पोस्टर सार्वजनिक गरिएको छ ।
प्रदिप शाहीको निर्देशन रहने फिल्मको निर्माण टिमले यसलाई सिक्वेलको रुपमा निर्माण गरिने जनकारी गराउँदै सोमबार नाम र थिम पोस्टर सार्वजनिक गरिएको हो। निर्माण पक्षले फिल्म तीन श्रृंखलामा निर्माण पारिने बताएको छ।
फिल्म ‘एक्लो-१’ हाल बनिसकेका र बन्दै आइरहेका फिल्मभन्दा फरक स्वादमा बन्ने देखाएको छ। थिम पोस्टरमा एक अन्तरिक्ष यात्रीलाई चित्रित गरिएको छ । सार्वजनिक पोस्टरमा पात्रको अनुहार नखुलाइ स्पेस सुटमा प्रस्तुत गरिएको छ। स्पेससुटमा नेपालको झण्डा अंकित भएको देख्न सकिन्छ।
पोस्टरको नेपथ्यमा भने जोम्बी अनुहार (मृत व्यक्तिलाई पुनर्जीवित बनाउने अलौकिक शक्ति)लाई चित्रित गरिएको छ । सार्वजनिक यो शीर्षक पोस्टरले फिल्मप्रति दर्शकहरुको जिज्ञाशा बढ्ने आशा गर्न सकिन्छ।
स्पेससुट लगाएका पात्र को हुन् ? भन्ने स्पष्ट नभएपनि फिल्मका प्रमुख पात्र खड्का रहेको अनुमान गर्न सकिनछ। फिल्मको थिम पोस्टरले पनि यसपटक निर्देशक शाहीले केही नयाँ कथा खोजेको बुझ्न सकिन्छ । फिल्मले नेपाल र अन्तरिक्षविचको कनेक्शन देखाउने अड्कल गर्न सकिन्छ ।
फिल्ममा प्रदीप खड्का र बेनिशाका अलावा विजय लामा, दीया पुन, कविता नेपाली, एवनराज उप्रेती, सुनिल थापा लगाएतको अभिनय रहनेछ।
शाइ प्रोडक्शन नेपालको ब्यानरमा निर्माण हुन लागेको फिल्ममा ह्याम्साएर एकाउन्टेनको सहकार्य रहनेछ । विनोद सुवेदी खत्री ‘क्षितिज’ कार्यकारी निर्माता रहेको यो फिल्मको छायांकन आगामी वर्षको साउनको अन्तिम साताबाट सुरु हुने तयारी रहेको छ।
हाल सेट डिजाइनको काम र प्री प्रोडक्सनको सुरुवात भई रहेको र फिल्मको छायांकनका लागि अन्तरिक्षमा जाने रकेटको निर्माणको तयारी भइरहेको कार्यकारी निर्माता खत्रीले बताए।
