काठमाडौं । रस्साकस्सी भएसँगै विवादमा फसेको सुदूरपश्चिम प्रदेशले मुख्यमन्त्री पाउने भएको छ । नेकपा एमाले आफैसँग फुटेर बनेको नेकपा एकीकृत समाजवादीका संसदीय दलका नेता दीर्घबहादुर सोडारीलाई साथ दिने भएसँगै सुदूरपश्चिमले मुख्यमन्त्री पाउने भएको हो ।
एमाले अध्यक्ष केपी शर्मा ओलीले सुदूपश्चिम प्रदेश संसदीय दलका नेता राजेन्द्र रावललाई फोन गरेर निर्देशन दिएसँगै एकीकृत समाजवादीका नेता सोडारीलाई समर्थन गर्न तयार भएको हो ।
यसअघि एमालेले सोडारीको नाममा आपत्ति जनाउँदै उनको विकल्प खोज्न एकीकृत समाजवादीसँग आग्रह गरेको थियो । अन्तिम अवस्थामा एमालेले सोडारीलाई समर्थन गर्न तयार भएसँगै सुदूरपश्चिममा गतिरोध टरेको हो ।
नेता सोडारीलाई एमालेसहित नेकपा माओवादी केन्द्र, नागरिक उन्मुक्ति पार्टीलगायत स्वतन्त्र सांसदको समर्थन गरेका छन् । सोडारीले मुख्यमन्त्री पदमा दाबी पेस गर्दै छन् ।
