काठमाडौं । टाइम ट्राभल (समय यात्रा)को कथालाई उठान गरेको नायक अनमोल केसी र नायिक जसिता गुरुङको मुख्य भुमिका रहेको फिल्म ‘फर्की फर्की’को दोस्रो गीत सार्वजनिक भएको छ । सुयोग गुरुङको लेखन तथा निर्देशनमा तयार भएको यो फिल्मको सार्वजनिक गीत गायक नरेन लिम्बुको आवाज रहेको छ । गायक, संगीतकार तथा गीतकार नरेन लिम्बुको सुपरहिट गीत ‘अन्तिम माया’को यो गीत रि-एरेञ्ज गरिएको हो ।
आगामी जेठ १० गतेबाट प्रदर्शनमा आउने फिल्मको शुक्रबार सार्वजनिक गीतमा लिम्बुकै कम्पोज र लेखन समावेश छ । फिल्मको गीतको भिडियोमा अनमोल केसी, जसिता गुरुङ फिचर्ड छन् । फिल्मकै कथावस्तुको महत्वपूर्ण प्लटमा तयार पारिएको यो गीतमा फिल्मका दुई मुख्य पात्रको विछोडको मनोविज्ञानलाई समावेश गरिएको बुझ्न सकिन्छ ।
भिडियोमा अनमोल र जसिताको प्रेममा असमझदारी आएपछि उत्पन्न हुने परिस्थितिलाई देखाइएको छ । नरेन र अनमोलबीच दोस्रोपटक सांगीतिक सहकार्य भएको हो । अनमोल अभिनित ९ वर्षअघि रिलिज भएको फिल्म ‘जेरी’मा पनि नरेनकै हिट गीत ‘भन्न आउँदैन’लाई रि-एरेन्ज गरेर समावेश गरिएको थियो ।
नरेनकै हिट गीतलाई निर्माता रोहित अधिकारीले कथामा आवश्यक परेर रि-एरेन्जसहित समावेश गरिएको बताए । ‘कथासँग यो गीतको गहिरो सम्बन्ध छ । दर्शक यो गीत सुन्दै भावनाको गहिराइमा पुग्न सक्नुहुन्छ’ अधिकारीले भने ।
रोहित अधिकारी फिल्मस्को प्रस्तुतिमा निर्माण भएको फिल्ममा अनमोल र जसिताका अलवा कृष्ण मल्ल, निर्मल शर्मा, रवि काफ्ले, समृद्धि अर्याल लगायतको पनि अभिनय रहेको भने फिल्ममा अभिनेता सलोन बस्नेत बिशेष भुमिकामा देखिएका छन् ।
फिल्मका निर्माता ओम प्रकाश अग्रवाल र रोहित अधिकारी हुन् । फिल्मका सह-निर्माता मनोज ओली र रामु न्यौपाने हुन् भने मोती कार्की र अनिरुद्र गिरी कार्यकारी निर्माताको रुपमा रहेका छन् ।
यो फिल्ममा नरेन्द्र मैनालीको छायांकन, सुरेन्द्र पौडेलको सम्पादन, रोमन बज्रचार्य र नरेन लिम्बूको संगीत तथा अष्ट महर्जनको द्वन्द्व निर्देशन र शंकर पाण्डेले प्रोडक्सन म्यानेजरको रुपमा काम गरेका छन् । फिल्मलाई गोविन्द शाहीको काफिया फिल्मस् र कुवेर सिने प्रोडक्सनले वितरण गर्दैछन् ।
अनमोल फिल्म ‘छड्के २’ प्रदर्शन भएपछि लामो समयको अन्तरालपछि नयाँ फिल्म मार्फत पर्दामा आउन लागेका हुन् । यो फिल्मलाई लिएर उनी निकै उत्साहित छन् । फिल्मको केही हप्ता अघि सार्वजनिक भएको ट्रेलरले दर्शकको माया पाइरहेको छ । यसैले, जेठको १० गते बक्स अफिसमा यो फिल्मले बम्पर ओपनिङ गर्ने अपेक्षा गरिएको छ ।
